Ka Jaiñtia National Council Western zone da ka jingsngew kyndit ka la leit ia kynduh bad u CEM ka JHADC u ma Thombor Shiwat haka kamra treikam jong u, ha ka jingialam khmat u samla Rangbah Hamehi Bamon da ka jingiasynran lang ki dkhot jong ka seng, kane ka jingleit mih jong ka seng ka long naka bynta ka shnong Lakaroi, kaba hap hapoh u pud u sam ka JHADC kumjuh ruh kaba hap hapoh ka jingpeit jong ka Dorbar Shnong Lapangap pyllun, bad ka seng ka la shem ba ha kane ka shnong Lakaroi, la shong la sah da ki jaidbynriew Karbi bad ki la don kumba 70 ïing bad ki lah ioh ruh iala u jong u Rangbah Shnong uba dei na ka jait bynriew Karbi hi, ka seng ka dap da ka jingsngewdiaw haduh katta katta bad hadien ba ka seng ka la shem ba kine ki briew Karbi ki basah ha poh kane ka shnong kaba dang hap pura hapoh u pud u sam ka West Jaiñtia hills District.
Kane ka shnong kam pat hap ha ki jaka bym pat pynbeit pud ne haki jaka ba iakajia pud bad ka sorkar Assam, kaba la pynlyngngoh bad sngew phylla bha ia ka seng.
U President jong ka JNC u Hamehi Bamon u la ong ba kat kum ki jingtip kiba u la leit lum ha ki por ba la dep ka long, ba kine ki briew Karbi kiba shong ha kane ka shnong ki la hap baroh haka jingpyniaid jong ka Dorbar Shnong pyllun ka dorbar shnong Lapangap, kat kum ka jingshem ka seng ba haduh ka jing iathep vote ruh ki la ia thep vote ha ka shnong Lapangap hi. Ki kot ki sla jong ki kiba pher bapher ruh ki la shim na ka shnong Lapangap.
Kawei kaba wanrah jingphylla ka long ba kat kum ba long mynta kine ki briew ki la rah iaki EPIC jong ki lane ki dur election jong ki naka bynta ka jingthep vote ka jong ki bad kumjuh ruh ia kikot kisla jong ki sha Assam bad ruh ba ki la ioh ruh ia u Rangbah shnong ba na ka jaitbynriew jong ki hi naka jaitbynriew karbi, bad la thung rangbah shnong ruh ia u da ka bor lyngba ka sorkar Assam.
Ka seng ka la dap da ka jingkyndit bad jingbitar jur ha ka ba iadei bad kane ka bynta bad ka seng ka la kyntu ia u CEM ban phah briew na JHADC ban leh iaka ba donkam ban pynduh syndon ia ka bor rangbah shnong ba la pynkupbor da ka sorkar Assam ha ka shnong Lakaroi bad ba ka sorkar Assam kam don hok hi ruh ban thung ia u rangbah shnong ha u pud u sam jong ka jylla Meghalaya, haka juh ka por ka seng ka la bthah ruh ban pynduh syndon ia ka rukom leh kine ki Karbi kiba shong shnong ha kane ka shnong Lakaroi. Kane ka jingshong jong ki ka la long ka jingshong beaiñ da ka jingthmu ka jingmut kaba imat don ei ei sha lyndet.
U CEM u ma Thombor Shiwat u la kular ban shim khia bad ban leh iaka ba donkam ha ka ba iadei bad kane ka mat.
U President jong ka seng u Hamehi Bamon u la ong ba lada ka District council kam leh iaka ba donkam na ka bynta ki mat kiba iadei bad katei ka jingleh bor, na ka liang jong ka seng kan nym shong kli kti.