Ka Jaiñtia Student Movement (JSM) Laskeiñ Circle hapoh ka jingïalam u Fortune Suiam kila lap ïa ka jingorpait ka jingkieng Rymphum Wahmyntang kaba ïaid lyngba ka shnong Laskeiñ sha Barato-Mukroh bad kiwei de ki shnong kiba don sha kitei ki thaiñ.
La ïathuh da ka seng ba kane ka jingkieng ka long kum u bud lum jong kitei ki Shnong kiba ïaid lyngba jong ka bad lada jia ba kane ka jingkieng ka khyllem ka long ka jingduhnong kaba khraw eh ïa ki nongshong shnong jong kitei ki thaiñ.
Halor kane ka seng kala dawa bad kyrpad ïa u Deputy Commissioner West Jaiñtia Hills ba un shimkhia mardor ïa kane ban pynsangeh shwa ïaki kali ba kit palat pud (Overload) ban ïaid lyngba jong ka, katba ym pat dep shna lane maramot (Repair) ïa ka jingkieng.
Kumba long mynta kane ka jingkieng ka lah ban buh jingeh ïaki paitbah kiba ïaid ba ïeng namar ki don ki bynta jong ki nar ba pynïasoh kila orpait bad lait noh bad kam long shuh kaba shngaiñ ïa ka leit ka wan ki paidbah.