Ka Khasi Student Union (KSU) Iooksi Circle ka la pynpaw iaka jingsngewkhia halor ka jingshah iehbein bad lehbeiñ ki skul Sorkar kiba don ha ki thaiñ Nongkyndong. Iakane, ka KSU Iooksi Unit ka la pynpaw hadien ba ka la ioh ban leit jurip dalade hi ia ka Govt LP School Iooksi Iapkhla ha kaba ka Seng ka la lap da la ki jong ki khmat iaka jingdap um katei ka skul mynhynnin ka sngi.
Ka KSU Iooksi Unit hapoh ka jingialam u Samla Sainia Sutnga President ka KSU Iooksi Unit, u samla Kamjuh Tangliang General Secretary ka KSU Iooksi Unit ha ryngkat ka jingdonlang u Head Teacher ka Iooksi Iapkhla Government LP School u Bah D. Nongrum ki la leit ban jurip iakane ka skul bad ki la lap ba katei ka skul ka la dap da ka um slap kaba jaw na ki tin kiba la pei bad kiba La bam sarang shi katdei eh.
Na ka liang u Head Teacher katei ka skul ula ong ba katei ka skul kadei ka skul kaba la rim bha bad ka la kynjoh palat 102 snem ka rta, hynrei ka jingbymshimkhia ka Sorkar ban tei pynbha iakatei ka iingskul ka la buh jingeh ia ki khynnah skul bad ia ki nonghikai ban pyllong skul haki por slap.
“Ngi la dep ujor sha ki bor badei peit ia kane ka jingjot kane ka iingskul hynrei kam pat poi shano shano ruh” la pynpaw une u nonghikai.
“Ngi isynei iaki khynnah skul ba ki hap ban shongskul wat hapdeng ki um slap namar tang shu jaw slap malu mala kane ka iingskul ka la dap daka um baroh kawei” la kren bynniaw utei u nonghikai.
“Sngewlehrain ban tip ba ka skul ka la kynjoh iaka 102 snem, hynrei ka iingskul ka dang jot rathai haduh mynta, lada ngi phai sha ka enrollment man u snem kane ka skul ka la nang kiew nangkiew kat nangmih ki snem bad kane ka skul ka dei ka skul kaba khampaw sha kine ki thaiñ jong ngi ha kaba ka lalah ban pynmih shibun ki heh ki hain na kane ka skul” la pynpaw u nonghikai. Na ka Liang u samla Sainia Sutnga President ka KSU Iooksi Unit ula ong ba shen na ka Liang ka Seng kan sa leit iakynduh iaki bor badei peit na ka bynta ban pynbor ia ki ban peit lem iakane ka skul khnang ba ki khynnah kin nym mad jingeh ban shong skul haki por slap.
