Kyntu jur ïa ka tnad PWD ban leh ïa kaba donkam
Ki nongïalam ka Khasi Student Union (KSU) West Jaiñtia Hills District ha ryngkat ki dkot ka KSU Shangpung Unit mynta ka sngi 17 tarik kila hiar ban jurip ïa ka jingkeiñ Umpyai kaba pynïasoh ïa ka shnong Shangpung bad ka Mynska West Jaiñtia Hills District.
Hadien ba ka seng ka la ïoh ïa ka jing ujor naki paitbah nongshong halor ka jingshong synjor jong katei ka jingkieng namar ka jingïaid jong ki trok kiba kit palat pud, wat hadien ba la don ka jingmaham na ka liang jong ka tnad PWD kaba la sieh ruh ïa ka Sign Board ha khmat ka jingkieng.
Na ka liang jong ka seng ka ban jur ïa ka tnad PWD ba kan shim khia ïa kane bad ym shah shuh ïa ki kali kit palat pud ban ïaid lyngba ka tei ka jingkieng bad la kyntu ïa katei ka tnad lada lap ïa kiba pynkheiñ ïa ki kyndon ba la buh da ka tnad PWD dei ban pynshitom ïa ki kat kum ka aiñ.
Ha kane ka juh ka sngi ki dhot jong ka KSU Kupli Area Circle ki lah hiar ban leit jurip sa ïa ka jingkieng Myllep kaba don ha shnong Saphai bad la lap ba katei ka jingkieng ruh ka don hapdeng ka jingma ïa ki nongleit nongwan namar ka jingkit palat pud jong kali heh ba ïaid lynba katei ka jingkieng.
Ka seng kala pynsngew lada jia baroh kitei ki 2 tylli ki jingkieng kin duh noh kan long ka jing jingjar kaba khraw eh ïa ki paitbah nongshong shnong kiba leit ba wan lyngba kitei ki jingkieng.
Na ka liang jong ka seng ka ban jur ïa ka sorkar lyngba ka shnat treikam jong ka PWD ban maramot noh kloi kloi ïa baroh 2 tylli kitei ki jingkieng khnang ban ka nym don ka jingma ïa ki paitbah ba leit ba wan.
La ïathuh ba ka jingkieng Myllep kaba don ha Saphai ka dei ka jingkieng ba pynïasoh ïa ka Iawthymme bad ka saphai, katba ka jingkieng Umpyai kan pynïasoh kumjuh ïa ki shnong kiba don shadien ka Mynska kum ka Khlookynriñ, Myntriang bad shaduh Byrwai.
