Mynta ka sngi ki dkhot jong ka Synjuk Waheh Chnong Jowai (SWCJ), ha ka jingialam u President ma Alan Niangti, General Secretary ma Riquoma Rq. Laloo, ki la leit ban jurip ia ka Maternal & Child Health (MCH) Hospital kaba don ha Panaliar, Jowai, West Jaiñtia Hills District, hadien ka jingioh jingujor na kiba bun ki paidbah halor ki jingeh kiba ki iakynduh na ka daw jong ka jingduna jong ka Hospital.
Ha kane ka sngi ka Synjuk kala ioh ban ia kynduh ia u Medical Superintendent (MS) kane ka Hospital u Dr. E. War ha ryngkat ka jingdonlang kiwei de ki Doctor ban ioh jingtip ia ki jingduna kane ka jaka ai jingsumar ka sorkar.
Ha kane ka jingiakynduh ki dkhot ka SWCJ ia u MS katei ka jaka ai jingsumar na ka liang jong u Dr. War ula ioh ban pynpaw ia shibun ki jingduna kane ka jaka ai jingsumar, naduh ka jingduna jong ki Doctor, ki nurse, ki nongtrei ha ki kam ba rit (Grade IV) bad kiwei kiwei. U pynpaw ruh ba kum u nongpeit ia kane ka jaka sumar u shem jingeh shibun namar kane ka jingduna ba kiba bun ki liang. Kumta u buh ka jingkyntu ia ka SWCJ ban ia shimkhia lang ban ki lad ki lynti halor kane ka jingeh kaba ka Hospital ka ia kynduh.
Na ka liang ka SWCJ, kan sa shim khia lang ia kane ka jingeh jong kane ka Hospital da kaba pyntip sha ki bor halor na ka bynta ban pynbit pynbiang ia ki jingdon kam baroh. Shuh shuh ha ka jingiadei bad ka jingkhuid jingjngiar jong kane ka jaka ai jingsumar na ka liang ka Synjuk kala kyntu jur ia ki nongwan shim dawai kumjuh ia ki ba wan thiah pang ba kin long kiba kitkhlieh hi da lade ban leh khuid leh suba ia kane ka Hospital paidbah.
