Ka Warjaiñtia Students’ Union (WjSU) hapoh ka jingïalam jong u Sports and Youth Secretary samla Deilang Syad haka jinghiar ban leit jurip dalade ïaka rukom pynshna ïaka madan ïalehkai Synthetic Football Turf jong ka Amlarem Sub-Division Sports Association (ASSA) kaba dang ïaid shakhmat mynta ha Ladjaplem, Amlarem WJHD.
Na ka liang ka seng kala lap shibun ki jingbym biang ha rukom pyntrei ïa kane ka projek khamtam ha kaba ïadei bad ka jingpynlut pynsep ïa ka pisa. Ka seng kala ïathuh katkum ka jingïoh jingkheiñ ha kaba ïadei bad ka jingpyntrei ïa ki jaka pyntuid um kiba don sawdong jong ka madan ka long haka jinglut kaba T.34,21,000/- tyngka hynrei ka rukom shna bad ki tiar ba pyndonkam kam ïahap satia lada kheiñ bha ïa ka rukom shna kaba long tang kumba 25% naka pynpynlut.
Halor kane ka seng ka kyntu ïa ka tnad Directorate jong ka Sports and Youth Affair ba kan wan ban jurip hi dalade ïa kane ka rukom pynshna madan bad bthah ban pyntrei katkum ki kyndon jong ka FIFA ne ka FIFA pro Quality Criteria.
Ha kaba ïadei bad ka rukom pynshna ïa ki jingker nar kiba don sawdong ka madan haka dor kaba T.57,65,000/- hynrei ïa kane ruh ym lah ban pdiang da ki paidbah jong ka Warjaiñtia namar ka rukom shna kam long kaba biang.
Na ka liang ka Sports and Youth Sub Committee jong ka seng kan sa ai da ka jingthoh sha ki bor ba dei peit ban dawa ban shna da kawei pat ka jingker kaba biang kumba long lem ha kiwei de ki Stadium.
Ha kaba ïadei bad ka rukom pynshna bad pynbha thymmai ïa ki jaka peitkai Gallery “Repair And Renovation Works (L/S) kala long haduh T. 52,35,000/- tyngka, hynrei kane ruh kam long kaba biang ka rukom pynwandur ïa ka jaka ban pynsuk ïa ki paidbah ban shong ha ki Gallery.
Ka seng haka jingwad bniah shuh shuh ïa ka dor ban siang ïa u phlang plastic (artificial Turf) ha katei ka madan la lap ba ka shongdor haduh T.4,82,92,000/- tyngka, hynrei katkum ka jingkheiñ ba la mynjur da ka FIFA kynthup ka jingshna ïa ki nala um ka shongdor ym palat ïa ka T. 1,85,00,000/- tyngka, la kynnoh ka seng.
Halor kine ki jinglap jong ka seng kan sa shim ïa ka sienjam ban ujor noh sha ka tnad Directorate jong ka tnad ïalehkai Sports ka jylla bad la rai ban pan biang ïa ka RTI ha ka sien kaba ar na u Chief Engineer, State Sports Council Meghalaya, Shillong. Ka seng kala kren shai lada kim ïoh ïa ki jingpynshai ba bniah kin sa leit ban ujor sha u Controller and Auditorial General (CAG), Lokayukta lane wat shaduh ka ïing bishar ba donburom jong ka High Court.
Na ka bynta ka jingmyntoi jong ki khun samla ka thaiñ War Jaiñtia, ka seng kan ïeng skhem ha ka nongrim ‘ban pynshna ïa katei ka madan ïalehkai kan long beit kaba ïa ryngkat kyrdan bad kiwei de ki madan hapoh ka Ri’. Pynkut ka kyrwoh na samla Gabriel Shylla uba dei u Publicity Secretary ka WjSU Central Body Amlarem.
