Ïa ka metïap jong ka heprit kaba dang saw snem ka rta kaba la tip kyrteng kum ka Insaphira Lyngdoh Mawnai na Nongrah Nonglum, kaba la jah rngai la lap noh na kawei ka ïing kaba dang shna ym jngai na ka ïingsah jong katei ka khynnah hynne ka step sngi nyngkong.
Ia ka met jong katei ka khynnah la iohi nyngkong eh da u nongbylla ba trei ha katei ka iing kaba dang shna.
Ka kynhun pulit ka la poi ha katei ka jaka bad rah noh ia ka ban leh ia ka Post Mortem sha NEIGRIHMS Hospital.
Kane ka khynnah ba la tip kyrteng kum ka Insaphira lyngdoh Mawnai ka la jah rngai na ka ïing sah jong ka ha Nongrah Nonglum ha ka step Sngi U Blei bad ki bahaïing ki la ujor da ka FIR ha Rynjah Police Station hadien ka jingjah jong ka.
Hadien kane ki paidbah nongshong shnong katei ka thaiñ, ha ryngkat ki dkhot ka Dorbar Dong ki la pynlong ia ka jingkhynra ban lap ia katei ka khynnah, hynrei kim shym la lap dien satia ia ka.
