U Superintendent of Police ka West Jaiñtia Hills, Jowai ula pyntip paidbah ba ki Pulit kila ïoh tam ïa ka shynrong briew (Skeleton) ka bym lah ban ithuh na ka khlaw Rachi jong ka shnong Mookyndur, West Jaiñtia, Hills ha ka 30 tarik u Risaw 2025.
Na ka liang ki pulit kiba dep ban leh katkum ki kyndon aiñ ba donkam bad ban pynlong ka jingtohkit. Hynrei ïa katei ka shynrong briew ym pat lah ban ithuh.
Shuh shuh u SP ula ïathuh na ka jaka ba lap ïa ka shynrong shyieng la lap ïa u ksai ba saw, lai (3) tylli ki shabi bad uwei u safety pin.
La kyrpad ïa kino kino kiba don jingtip shaphang u/ka briew bala khlad ki lah ban wan shakhmat ban ïoh pynithuh. Da kaba ki lah ban leit kynduh sha ki Police Station kiba ha jan lane pyntip sha u number jong ka Ummulong Beat House (6002152968/ 9774065467) hapoh san sngi naduh ba la pynmih ïa kane ka khubor.
