Ki Pulit jong ka East Jaintia ha ka 27 tarik mynta u bnai ha ka por kumba 11:05 AM, kila ioh jingtip lyngba u Secretary jong ka VDP Lamyrsiang u ma Niwankijuh Bareh ba ka don kawei ka met iap jong u rangbah briew kaba per ha sla um jong ka wah Saitharlong kaba hap hapoh ka Umpleng Police Out-Post.
Haba ioh jingtip ia kane na ka liang jong u SI ma O. Nongtdu ryngkat bad ka kynhun jong u kila leit sha ka jaka ba jia ban pynlong ia ka jingtohkit.
La lap ba katei ka met iap kaba la sdang pyut ka dei ka jong u rangbah briew, ym don napdeng ki trai shnong kiba lah ban ithuh ia une uba khlad.
Hadien ba la pyndep katkum ki kyndon aiñ ha katei ka jaka la pynkit noh ia katei ka met iap sha Khliehriat Civil Hospital ban pynlong ia ka post mortem. Ia kane ka met iap la buh ha ka jaka buh met iap jong katei hi ka Hospital ban ap lada don kiba haiing ban wan shimti ia ka.
La iathuh ba une u rangbah u don ha ka rta kaba 35-40 snem, ka jingjrong kumba 5 phut ei ei, u phong da ka T-Shirt bad don ka dur “monkey D-LUFFY” bad ka patlun shiteng ba thoh lain stem ha baroh ar liang, u don ki dak suh na ki bynta ka shyllangmat ka diang bad ha ka khlieh na ki bynta ba shadien.
Kino kino kiba lah ban ithuh ia une u rangbah la kyntu ia ki ban ia kynduh ia u I/O lane phone ha une u number: 9366445568, la pyntip u S.P ka East Jaintia Hills District.
