Ha ka step jong ka 23 tarik mynta u bnai ki Pulit jong ka ophis u Superintendent of Police, East Jaintia Hills District, Khliehriat kila ioh jingtip lyngba u Waheh Shnong jong ka Ladrymbai Datsimpeiñ ba ka don kawei ka met iap jong u briew ba la rangbah bym lah ban ithuh dur khmat kaba la thiah lyngkthar harud jong u surokbah NH-6 ha ki bynta jong katei ka shnong.
Mar sien ioh jingtip ia kane na ka liang jong ki Pulit ka Ladrymbai OP kila leit sha katei ka jaka ban shimti ia ka jingjia bad ban pynlong ia ka jingtohkit. Ki Pulit kila iathuh ba utei u rangbah u don ha ka rta kaba 55-60 snem ei ei, u don ka jingjrong kaba 5.5 phut ei ei, u don ka snieh doh kaba kham shai, u phong tang da ka patlun kaba lyngkot rong iong.
Hadien ba ki Pulit kila dep ban leh ia kaba donkam kila leit buh ia katei ka met iap sha Civil Hospital Khliehriat na ka bynta ban pynlong ia ka Post-mortem. Ia katei ka met iap la buh sah mynta hapoh ka jaka buh metiap jong katei ka Hospital.
Na ka liang ki Pulit kila buh ka jingkyntu ia kino kino kiba don jingiadei ne kiba ithuh ithaw ia u tei u rangbah ba kin leit mih sha katei ka Hospital lane ki lah ban phone ha u number 7005912115 na ka bynta ban shimti ia katei ka metiap.