Ka khubor Pulit kaba la phah mynta ka sngi la iathuh ba ha ka 18 tarik mynta u bnai ha ka por kumba 7:00 baje mynstep katto katne ki kynhun nongleit jingleit na ka Jylla Mizoram kiba wan da ka kali Tata Sumo kila sangeh ha rud u surok bah NH-6 hajan jong ka shnong Kuliang na ka bynta ban leit shabar, hynrei kyndit kynsan kila iohi ia kawei ka metiap kaba la tap bha da ka kombol kaba la bret haruk surok bah.
Hadien kane mar mar ki la ai jingtip sha ki Pulit jong ka Umkiang Police Patrol Post (PPP) kiba dang don duty ha u surok bah NH-6.
Na ka liang jong u Sub-Inspector P. Phawa ryngkat bad ka kynhun jong u kila leit sha katei ka jaka ba don katei ka metiap kaba jngai kumba 8 Km na Umkiang PPP. Na ka liang ki bor Pulit kila pynlong ia ka jingjurip ia katei ka metiap, hynrei kim lap shuh ia kino kino ki dak mong namar ba katei ka met kala khreh pyut.
La antad ba kane ka metiap ka dei jong u rangbah ba don ha ka rta kaba 35-40 snem ei ei bad u don ka jingjrong kaba 5’5″. Une u rangbah u phong da ka patlun rong iong, ka T-Shirt rong jyrngam bad u don ka jingteh tyllai balieh ha syngkai jong u kaba pyni ba u lah ban dei u riew ngeit Hindu, la ong ki Pulit.
Hadien ka jingjurip ia kane ka metiap la leit rah sha Civil Hospital Khliehriat bad la buh ia ka ha ka jaka buh metiap, ban ap ia ka jingwan shimti jong kiba haïing hasem ne kiba don jingiadei.
Na ka liang jong ki Pulit kila kyntu ia kino kino kiba don ka jingithuh ia une uba la khlad ba kin pyntip kloi sha u ophisar ba dei peit lane phone ha kane ka number 8131904491.