Ki khnai kidei kiwei na ki jingeh bad ki nongshun ba khraw kaba ki nongrep ki ïakynduh ha ki jaka rep bad ki jaka buh mar rep jong ki. Ka iai bun jong kine ki khnai kiba roi sted na uwei u snem sha uwei pat, ka wanrah ka jingpynjot bad jingduhnong kaba khraw ïa ki jingthung jingtep bad ka ktah sa ïa ka ïoh ka kot bad ka jingmih jong ki mar rep.
Ki khnai ki long ka jingma ia ka koit ka khiah jong ki mrad ba la ri ha ïing bad kumjuh ia ki briew namar ki dei ki nongkit ba kongsan jong ki jingpang ba har rukom. Ka jingbun ki khnai ka nang kiew stet haduh katta katta kaba la kiew 800 haduh 1200 ha ka jingbun man la u snem.
Na ka bynta ban pynduna ia ka jingbun jong ki khnai ha ki jaka rep, na ka liang u ophisar u bah D.B. Dhar uba long u ophisar jong ka District Horticulture, East Jaintia Hills District, Khliehriat, u la lap thymmai ia ka buit ban riam bad pyniap iaki khnai ha kaba mynshuwa la pyndonkam beit da ki dawai pyniap khniang kum ka zinc phosphide, ki cake robban, bad kiwei kiwei hynrei ka jingpyndonkam ia kine ki dawai ka ktah shibun ia ki mrad ba ri ha ïing kum ki ksew, ki miaw, ki sim, bad kiwei kiwei.
Nalor kata, ka jingsma kaba mih na ki met ba pyut jong ki khnai ka pynmih ia ka jingsma kaba ktah ktah ia ki briew bad sawdong sawkun. Hynrei hadien ba la khang ia kum kine ki dawai, ki nongrep kim don lad shuh ban tehlakam ia ki khnai bad ha kiba bun ki khep ki wanrah ia ka jingduhnong kaba khraw ia ki jingthung jong ki kum u phan, u kew, u kba, u sohsaw bad kiwei kiwei ki jingthung ha ki lyngkha bad ha ki jaka buh marbam.
Ban pyllait ia ka jingkit kaba khia jong ka jingwan hiar thma na ki mrad kiba kham poh, u ophisar u la thaw ia ka rukom riam da ka buit thymmai da kaba suk ban shna kata tang da kaba pyndonkam da tiar ba ioh na la ïing kum u atta, ka ktung tyrkhong, ki bilor, tyndong siej, ka pliang, u thlong bad synrei.
Ia kane ka jingpyrshang la pynlong ha ki katto katne ki shnong jong ka East Jaintia Hills bad la lap ba ka long kaba treikam nalor ba ka long kaba ym don jingktah ia ka mariang bad ki jingthung jingtep ha ki lyngkha pyntha bad ka sawdong sawkun.
Ia kane ka Booklet kaba la ai kyrteng DUNG BILOR Rodent Bait (KA JINGBAM PYNIAP KHNAI) ka ban ai jingtip ia ki nongrep, ka ba la pynbit pynbiang da u tei u ophisar ma D.B. Dhar la dep ban pyllait paidbah ha ka 20/09/2024, da i Director ka tnat Horticulture i Kong D. Sohtun.
