Ban kyntiew bad pynkhlaiñ shuh shuh ïa ka jingtip halor ka Information and Communication Technology Infrastructure ha ki skul jong ka East Jaintia Hills District, u myntri ka sorkar jylla uba long u MLA ka Khliehriat, u ma Kyrmen Shylla bad ka MLA ka Sutnga-Saipung, ka Kong Santa Mary Shylla, mynta ka sngi Balang ki la sam ia ki Desktop (Computer) sha ki skul ba la jied hapoh ka District Mineral Foundation (DMF) Scheme, ha ka jingialang kaba la pynlong ha Conference Hall jong ka ophis u Deputy Commissioner, East Jaintia Hills District, Khliehriat, ha ka jingiadon lang ruh u Deputy Commissioner, East Jaintia Hills District, u Shivansh Awasthi, IAS, u Sub-Divisional Officer (SDO)-Sadar, East Jaintia Hills District, Manish Kumar, IAS, ki nonghikai bad kiwei pat.
Haba kren ha kane ka sngi, u ma Kyrmen Shylla u la pynpaw ïa ka jingsngewkmen ba la lah ban ai jingmyntoi sha ki khynnah skul jong ka thaiñ lyngba ka DMF bad u la ong ruh ba ki skul kiba ioh ïa ki computer ha kane ka sngi, ki dei kiba la jied halor ka nongrim ka rukom trei shitom bad ka jingnoh synñiang jong ki na ka bynta ki khynnah skul. U la kdew ruh ïa ka jingkongsan ban pynsngewthuh ïa ki khynnah skul halor ka jingdonkam jong ka computer ha kane kajuk mynta bad u la khmih lynti ba kine ki computer kin ai lad ïa ki khynnah ban ioh jingnang bad jingtip shuh shuh ha ka liang ka pule puthi digital.
U ma Kyrmen haba kren shuh shuh halor ki jingeh ba ki skul ki ia kynduh, u la pynbna ruh shaphang ki mat treikam bapher bapher kiba la shim da ka DMF ban ai jingmyntoi sha ki paidbah ha ka liang ka pule puthi, ki lynti ki syngkien, ki sports bad kiwei de.
Ha ka jingkren jong ka kong Santa Mary Shylla, ka la ong ba kane ka jingpynpoi ne pynioh ia ki computer sha ki skul ka long ban ai lad ïa ki khynnah ban ioh lad ban pule shuh shuh bad ka kyntu ruh ïa ki skul ba kin pyndonkam hok ïa kine ki computer na ka bynta ka jingmyntoi jong ki khynnah ha ka liang ka pule puthi.
U Deputy Commissioner, East JaintiaHills District, u Shivansh Awasthi, IAS, u la ong ba ka District Administration ka ai computer sha ki skul ban pynioh ha ki ia ka jingnang computer ba kyrpang ïa ki khynnah, namar kumba long mynta baroh ki rukom trei ne pule kiba bun hi dei lyngba ki kor computer.
U Sub-Divisional Officer (SDO)-Sadar, East Jaintia Hills District, u Manish Kumar, IAS, ha ka jingkren jong u, u la pynshai ïa ka jingdonkam ban pynrung ïa ka jingpyndonkam computer bad internet sha ki jinghikai ba man ka sngi khnang ban ïoh jingmyntoi na ka bynta ki khynnah skul.
