Ïa ka lehñiam Durga Puja ha Jowai yn sa pynkut lashai ka sngi 24 tarik da kaba leit ban pynngam um ïa ka blei Durga ha ki bynta ka Wah Myntdu (Syntu Ksiar).
Haba leit sakhi ïa kane ka lehñiam ki paid riewngeit Hindu mynta ka sngi nyngkong ha Shiv Mandir Ïawmusiang, Jowai kala long kaba ïaid beit ïaid ryntih hapoh ka jingpynïaid ka Jowai Durga Puja Committee.
Ha kane ka sngi haka por 11 baje mynstep la don ka jinglehniam pom blang ba la wanrah haduh 9 tylli, da kaba pynsngew ha kane ka lehñiam Durga kino kino ki riew ngeit Hindu ki lah ban wan pom ïa ki Blang ha kane ka jaka mane blei jong ki (Mandir).
Hashwa kane ka jingpom blang kala don ka jingot ïa u pathaw, sohkhia, soh Apple, ka kait bad kaba khadduh ïa ka Blang. Shuh shuh ha kane ka lehñiam Durga Puja kala don ka jingshah thngan ha ki ïing ki sem jong ki riewngeit Hindu.
Na ka liang u S. Chakraborty, President Jowai Durga Puja Committee ula ong kane ka lehñiam kala sdang naduh ka 20 tarik Risaw bad yn pynkut lashai ka sngi 24 tarik u Risaw, ula ong ka jingpyndep ïa kane ka lehñiam kan wanrah ïa ka bha ka miat, ka jingïalong kawei bad ka jingkmen ha ka Ri bad ka pyrthei hi baroh kawei.
Ïa kane ka juh ka lehñiam Durga Puja ha West Jaiñtia Hill la leh kumjuh ha Nartiang kaba dei ka lehñiam Durga Puja ki Pnar bad kumjuh ha Dawki.
Mynta ka sngi na ka liang jong u Pa Daloi ka Elaka Jowai u Puramon Kynjing, u President ka Seiñ Raij Jowai ma Hercules Toi bad kiwei de ki dkhot jong ka raij kila poi iashim bynta lang ha Shiv Mandir ban mane bad nguh ia ka blei Durga.
