Ka jingiakob Miss Meghalaya 2024 bad Miss Teen Meghalaya 2024 kaba la ap khmih lynti bha la buh ban long ha ka 3 tarik u Nailar 2024 ha Lariti Multipurpose Hall ha Mawkasiang. Ïa kane ka jingïalang kaba don burom la pynlong da ka Meghalaya Tourism bad ka tnad Arts and Culture, ka Sorkar Jylla.
Ha kane ka sngi u Myntri Rangbah ka Jylla u Shri Conrad Sangma un long kum u Kongsan, katba u Myntri ka tnad Tourism, Arts and Culture, Textiles un long kum u symbud kongsan ha kane ka sngi. Ïa kane ka jingïalang la kyrshan shuh shuh da ka Atomy India kum ka Beauty Partner bad ka Lakme Academy Shillong kum ka Makeup Partner, da kaba pynthikna ba ki nongïakop kin pynpaw ïalade kaba bha tam.
Mynta u snem, ki don baroh 38 ngut ki nongiashim bynta, ha kaba 19 ngut kin iakhun ban ioh ia ka nam Miss Meghalaya 2024 bad sa 19 ngut pat na ka bynta ka Miss Teen Meghalaya 2024. Ka nongjop jong ka Miss Meghalaya 2024 kan pynthikna ia ka jingrung beit sha ka Miss Universe India 2024 bad kiba wan ba-ar kin mihkhmat ïa ka Meghalaya ha ka Miss Northeast 2024.
Ka nongjop ïa ka Miss Teen Meghalaya 2024 kan leit ban mihkhmat ïa ka Meghalaya ha ka Miss Teen Diva 2024 ha Jaipur.
Ki nongiashim bynta ki pynpaw ia ka jingsngewtynnad ban ioh iashim bynta ha kum kine ki rynsan ban ioh pyni ia la ki jong ka sap kaba kyrpang kaba la ai ha ki.
