Ka Behdeiñkhlam jong ka Raij Ialong kaba kdup lang ia ka Raij Wahiajer bad Nongkhyllep kaba ju long shisien shisnem kan kut bad nohrong ha kane ka 7 tarik mynta u bnai ha Madan Aitnar Ialong, ha kaba u ma Sniawbhalang Dhar uba long u Symbud Myntri Rangbah ka Jylla Meghalaya u long u kongsan katba u ma Wailadmiki Shylla uba dei u Chairman ka Meghalaya Urban Development Authority uba dei ruh u local MLA u symbud kongsan.
Ka programme jinglehniam Behdeiñkhlam ha kane ka sngi kan sdang da ka Khuid Sympiah (Rongblai) naduh ka por shibaje nohphai sngi ter-ter, ka nohrong ha ka por 4 baje bud sa ka tyngkhaiñ Bhang, ka iatan Khnong, Iaslait Niam bad kut haduh ka por 9:00 baje mynmiet da ka ba pyndep Niam Behdeiñkhlam ha Yung Lyngdoh.
Kum ban shuh pynkynmaw ka jinglehniam Behdeiñkhlam ka Raij Ialong kala sdang naduh ka 30 tarik u July (Naitung) da ka khrong ka tri na ki Khon jong ka Raij, ha ka 31 tarik kala don ka Kñia Khang / Blai Khlam bad ka 30 Ryngkaw, ha ka 5 tarik u August (Nailar) kala don ka jingpynieng Khnong, ha ka 6 tarik ki 9 Wasan kila leit pynbiang ia ka Khnong Blai ha Aitnar bad kan kut noh lashai ka 7 tarik u August 2025.
