Ka Krishi Vigyan Kendra (KVK) Jaiñtia Hills, mynta ka sngi 11 tarik u Jylliew ka ba dei ka sngi ba khadlai (13) na ka prokram ‘Viksit Krishi Sankalp Abhiyan’ (VKSA) ki la bteng ban leit ai jinghikai ïa ki nongrep ka Jaiñtia Hills kaba kynthup ïa ki 9 tylli ki shnong kiba hap hapoh ka Thadlaskeiñ Block.
Kine ki shnong ha Thadlaskeiñ C&RD Block ki kynthup ïa ka Mookabeng, Nonglatem, Moorap, Iongshiwiat, Nongdhar, Moorathud, Khliehriat, Mynkrem bad ka Takhniang Iongsnieh. Baroh ki nongrep kiba la wan ïashim bynta ki don haduh 941 ngut, ha kane ka sngi la sam ruh ïa ki symbai ba bunjait shaki nongrep.
Na ka liang ki dkhot ka KVK kiba leit ban ai jinghikai sha ki nongrep la pynbynta ha ki lai tylli ki kynhun ha ryngkat ka jingdonlang ki Scientist, ki ophisar bad ki nongtrei ka tnad ka rep ka riang.
Ha kane ka prokram, la ïa jinghikai ïa ki nongrep naduh ka rukom rep ïa ki jaitsoh, ka rukom ai dawai ïa ki jingthung ka rukom pynïaid ïew ïa ki mar rep, ka rukom ri ïa ki jingri, nalor kiwei kiwei de kiba long katkum ka jinghikai jong ka juk stad mynta (technology).
La batai ruh shaphang ki skim bapher bapher jong ki nongrep kiba lah ban ïoh naka sorkar kum ka PM-KISAN, NMEO, PMFBY, Soil Health card (SHCs), ka skim kaba ïadeibad jhur, ki soh, ka PMFME Scheme, ka Power tiller scheme, nalor kiwei de ki skim kiba lah ban ïoh jingïarap. Shi bynta na kane ka prokram ‘Viksit Krishi Sankalp Abhiyan’ (VKSA) jong ka sorkar kmie, yn pynkut ïa ka lashai ka sngi 12 tarik u Jylliew, 2025 da ka jingthmu ban pynbha pynmiat ïa ka rep ka riang hapoh ka Ri katkum ka juk stad thymmai.
