Ka “Nul-Ding Kût” ka dei ka jinglehkmen kaba la ju tip kum ka “Festival of Renewal of Life” ka dei ka wei na ki jinglehkmen tamasa ba paw bad ba donburom jong ki jait bynriew Biate, kiba kham bun ki shong ki sah ha ki bynta jong ka ri Lum Jaiñtia (East Jaiñtia). Ia kane ka tamasa la rakhe naduh ki kulong ki kumah jong kane ka jait bynriew, bad ha kane ka juk ba mynta la pynim bad pynbha shuh shuh ia ka da ka kynhun ba la tip kum “Biate Cultural Organisation of Meghalaya” naduh u snem 2005 bad la rakhe ia ka man la ka 11 tarik jong u Kyllalyngkot jong ka snem.
Ka sorkar Meghalaya lyngba ka ophis treikam jong u Deputy Commissioner, East Jaintia Hills District kala ai shuti (Local Holiday) ia ka 11 tarik u Kyllalyngkot naduh ka snem 2014 ter ter haduh mynta. Ka Nul-Ding Kût ka dei ka tamasa kaba la ju leh hadien ba la dep ban lum ban lang ia ki mar rep mar riang bad la rakhe ia ka ha kine ki aiom tlang, kaba pyni ia ka jingkut noh jong ka jingtrei shitom bad ka jingsdang jong ka jingkmen ha kaba ki briew kila ioh ban kheit ia u soh ba thiang jong ka jingtreishitom jong ki.
Kane ka tamasa ka long kaba pher bad kaba long kyrpang ha kaba naduh u Syiem bad ki riew paidbah shynrang bad kynthei, samla bad tymmen kila ia wan lang hajuh ban lehkmen ia kane ka tamasa da ka mynsiem jong ka jingiamap, jingiaieit bad ka jingbymkheiñ iapher kyrdan bad kin klet noh ia ki jingleh bakla jong ki por kiba la dep. Ka Nul-Ding Kût ka wanrah ha uwei pa ka wei ka jait bynriew Biate kum ka por kaba kyrpang ha kaba kin ia klet noh ia kiei kiei kiba rim bad ban iashong lang ban ia pyrkhat lang ia ka bha ka miat bad ka roi ka par jong ka jait bynriew Biate.
Lyngba kane ka tamasa Nul-Ding Kût ka wanrah ia ka jingpynneh pynsah ia ka riti ka dustur kaba la jan duh noh napdeng ki jait bynriew Biate. Ha kane ka tamasa ka la long ka lad ba ki khun ki hajar kin pyni ia ki riti ki dustur tynrai la ka dei ha ka shad, ka rwai, ka siaw, ki jingiathuh khana hyndai, ka suh ka thaiñ bad kiwei de. Dei lyngba kane ka jinglehkmen tamasa ba yn sa lah ban ai pateng pat ia ki riti ki dustur ha ki pateng bad longdien ba dang wan.
