Ka Chilliangraij SSA UPS shi bynta ban leh burom ïaka World Literacy Day 2024, ha kane ka 6 tarik u Nailur kala pynlong ïa ka jingïalang kynmaw burom ïa kane ka sngi kyrpang da ka jingïashim bynta lang ki khynnah skul bad ki nonghikai.
Ha kane ka prokram la ïoh ïa ka jingïathuh khana lyngkot shaphang ka nongrim jong ka World Literacy Day bala ai da ka kong H. Iakai, Head Teacher Chilliangraij SSA UPS, la ïoh ruh ka jingpule recitation shaphang ka jingnang jingstad bad ka jingthoh Slogan bala shim bynta da ki khynnah skul.
Na ka liang ka H. Iakai haka jingkren kala batai bniah shaphang ka phang jong ka World Literacy Day 2024, kaba ong ‘Promoting Multilingual Education- Literacy for Mutual Understanding and Peace’.
Halor kane ka phang ka kong H. Iakai kala pynsngew ba donkam ban pynrung ha ki jingmut jingpyrkhat ki khynnah skul katkum ki jingtip ba thymmai, kata donkam ban tip ban pule bad ban thoh ïa kiwei de ki jait ktien, “hynrei kynmaw ba ym dei pat ban lyndet ïala ka jong ka ktien kaba long ka dustur jong ka jaitbynriew”.
