Ka Dorbar Shnong Loomkyrwiang, Jowai shi bynta na ka jingrakhe ïa ka Children’s Day, ha kane ka 14 tarik u Naiwieng kala leh burom ïa kane ka sngi jong ki khynnah kiba shong ba sah hapoh u pud u sam jong ka shnong ha ka jingïalang bala pynlong ha Dorbar Hall jong ka Shnong ha ryngkat ka jingdonlang jong ki kmie ki kpa.
La sdang ïa ka jingïalang da ka jingnguh Blei da u S.D. Laloo, General Secretary ka LDC, katba ka Samhakani Laloo Secretary WWC-LDC kala long kum ka shongknor kaba la ai ki kyntien pdiang sngewbha da kaba pynsngew shaphang ka kyrteng jong u Pandit Jawaharlal Nehru.
Kala ong mynshwa ka rukom im jong ki khynnah kala ïapher bha haba ïa bujor bad ki sngi ba myntai, kumta ka kyntu ïa ki kmie ki kpa ba kin don ka jingïohi jngai na ka bynta ka jingbha jingmiat jong ki khun ki kti, khnang ba ka shnong ka thaw kan wanrah ïa ka bha ka miat.
Ha kane ka sngi la ïoh ruh ki jingkren kyntu kynpham da u ma Lammat-OO Laloo, Waheh Shnong, LDC ula pynsngew shaphang ka jingim briew ha ki saw aiom, da kaba ong ba ka jinglong khynnah ka long kaba dap tang da ki jingkmen suda.
Shuh shuh ula ong haba phai sha ka juk jong ka Mobile mynta kaba la ima bha ha kaba ki khynnah kila im ha ka jinglong ba marwei kaba la pynïajngai ïa ka jingïadei bad ka jingïaieit ïa ki jan ïing jan sem bad ki lok ki jor ba mar jan. Kumta u buh ka jingkyntu ïa ki kmie ki kpa ba kin long kiba stad katkum u pud haba ai jingbit ïa ki khun ki kti.
La pynphuh pynphieng shuh shuh ïa kane ka prokram da ki jingrwai, ki jingshad, ka jingsam ïa ki tiar sha ki khynnah bad ka jingot ïa u Cake Children’s Day. Na ka liang ka Dorbar Shnong ka pynpaw ka jingsngew nguh kaba khraw ïa baroh kiba la don bynta lang ha kane ka sngi kyrpang.
