Ka Loomkyrwiang Dorbar Shnong Ñiamtre Committee hynnin ka sngi hakhmat ka ‘Dorbar Ya Syllok Behdieñkhlam’ ka Seiñraij, Jowai kala pynlong ïa ka jingpynkup burom ïa ki riew rangbah ne ki waheh wasian jong ka Dorbar Shnong shi bynta na ka lehñiam Behdeiñkhlam.
Ka Dorbar Shnong kala leh ïa kane kum ka dak ban pynpaw ka jingsngewnguh ïa kitei ki waheh wasian jong ka shnong haka juh ka por ban pynsah jingmynmaw ruh halor ki kam babha kiba kila dep ban synñiah hapoh ka shnong ne hapoh u ‘loom u pdein’ ban burom ïa u Trekirot haki ‘Soo sngi Le Iaw’ jong ka Shad Ñiam Behdieñkhlam.
Ki waheh kiba la ïoh kane ka burom naka Loomkyrwiang Dorbar Shnong, Ñiamtre Committee ki kynthup ïa u Chibor Najiar, u Poiwan Shullai, u Rishanki Shullai, u Dayoohioo Laloo, u Thiangmon Laloo, u Latmon Laloo, u Darapshngain Laloo bad u Damonbha Shullai.
Na ka liang u S.D. Laloo, General Secretary Loomkyrwiang Dorbar Shnong haka jingkren ula kitbok kitrwiang ïa kitei ki waheh, u kyrmen ba kum kane ka jingleh burom kan dang ïai bteng ha ki sngi ban wan na ka bynta ka jingbha jingmiat jong ka imlang sahlang bad ka burom jong ka Dorbar Shnong.
Ha kane ka ‘Dorbar Ya Syllok Behdieñkhlam’, ki khun ka Dorbar Shnong kila ïoh shibun ki jingmyntoi lyngba ki jingkren kyntu kynpham na ki waheh wasian shaphang ka Behdeiñkhlam bad kumjuh ïa ki bynta kiba dei ban pyndep haki ‘Soo Sngi- Le Iaw’ haka lynti ban pynjanai shuh shuh ïaka jinglong kyrpang ka ñiam ka rukom, ka dustur ka riti katkam ki hukum U Trekirot.
Kiwei de kiba la don bynta ha kane ‘Dorbar Ya Syllok Behdieñkhlam’ ki long u Anthony Challam, u Dasajeki Rymbai, u C. Tympang Laloo, ka Dr. WaI sa Sumer kiba la mihkhmat ïaka Ñiamtre Committee, Seiraij nalor ki dkhot ka Dorbar Shnong ba kynthup ïa u ma Lammat-OO Laloo, Waheh Shnong bad u ma S.D. Laloo, General Secretary.
