Ka H.K. Singh Memorial Secondary School, Jowai mynta ka sngi kala leh burom ïa ki khynnah ïalehkai phutbol Under-14 jong ka skul, kiba la ïoh rah ïa ka nam lahduh ha ka State Level Subroto Mukherjee Cup Football Tournament 2023 kaba dang shu dep shen ha nongbha Shillong.
Ïa kane ka prokram pynkup burom la leh ha Hall jong katei hi ka skul, ha kaba u MLA ka Jowai ma Wailadmiki Shylla ula long kum u kongsan, ha ka jingdonlang naduh ka synbud kongsan kong A. Syiem DSEO-WJHD, u DSO ma K. Passah, ki nongkitkam ka WJDSA, ki nonghikai bad ki khynnah skul.
Ïa ka jingïalang la pynïaid da ka nonghikai skul ka kong H. Shylla, la ïoh ruh ka jingduwai hashwa ban sdang ka prokram bad ka jingpyndeng syntiew ïa ki nongshah khot sngewbha.
U ma Wailadmiki Shylla haka jingkren ula ai ka jingïaroh ïa ki khynnah ïalehkai phutbol jong ka H.K. Singh kiba la treishitom ban ïoh leit mihkhmat syndon ïa ka jylla sha ka National Level ka ban long shen ha nongbah Bangalore.
Ula pynsngew ba kiba bun na ki rangïaleh hapoh ka jylla ki mih napoh ka Ri-Lum Jaiñtia kumta u kyntu jur ban treishitom shuh shuh bad kum u MLA ka thaiñ un ïaleh ban ïakren hapoh ka ïing dorbar ban pynïoh jingïarap na ka bynta ki rangïalehkai jong ka District, ula pyntip ba ka kam ïalehkai Sport mynta ki sngi ka long kum kawei na ki lad ïohkam ïoh jam kaba heh bha haka jingsiew.
Na ka liang jong u kum u MLA ka Jowai Constituency ula kular ruh ban ai jingïarap haduh shilak tyngka ïa ka skul kaba mih khmat sha ka National Level bad ïa kane un bteng katba u dang long kum u MLA ka Constituency.
La ïoh ruh ka jingkren ha kane ka sngi da ka kong A. Syiem kaba la kyntu ïa kitei ki rangïalehkai ba ki don Akor burom (Discipline), ka jingtrei shitom bad kim dei ban duh jingkyrmen hynrei ban don ïa ka mynsiem jingïaleh.
Katba na ka liang u Principal jong ka skul ma T. Passah ula batai shaphang ka jingïaid lynti jong ka skul naduh ba la wan seng ïa ka ha nongbha Jowai, ula ong ba kane ka jingjop jong ki khynnah skul ‘kan nym urlong lada ym dei da ka jingtrei shitom jong kitei ki rangïalehkai’.
Na ka liang u kongsan ha kane ka sngi ula sam ruh ïa ki Momentous bad ki syrnot sha kitei ki rangïalehkai Under-14 jong ka skul kumjuh ruh ïa u Coach bad Manager. La pynshong shit ïa kane ka prokram da ki jingshad bad ki jingrwai na ki khynnah skul.
