Ka jaka kynshew snam kaba don ha nongbah Jowai ïa kaba la tip kum ka Jowai Civil Hospital Blood Centre, Panaliar mynta u snem ruh sa shisien kala leh burom biang ïa kito ki dkhot kiba ju wan ban synniang ei ïa ka snam jong ki ha kane ka jaka kynshew snam.
Ïa kane ka jingle burom la pynlong ha ka 14 tarik mynta u bnai kaba dei ruh ka World Blood Donors Day, kaba don ruh ïa ka phang (theme) “20 Years of Celebrating Giving: Thank You, Blood Donors”
Ha kane ka sngi u ADC bah F.B. Basan, MCS ula long u kongsan. U bah Basan ula pynpaw ka jingïaroh ïa baroh kito ki briew kiba la synniang ei ïa la ka jong ka snam na ka bynta ban pyllait im ïa kiba bun ki mynsiem. Ula ïalam ruh ban pule ïa ka jingshim kular (pledge) kaba ong ba dei ban synniang ïa ka snam manla ka por bad ban ai ka jingpynsngewthuh sha kiba haïing hasem, ki lok ki jor, ki kur ki kha ki man shaphang ka jingdonkam ban long kiba la kloi ban synniang ïa la ka jong ka snam khlem kano kano ka jingsiew dor.
Ka Dr. I Khyriem, Senior Medical & Health officer, Jowai Civil Hospital Blood Centre expresses ka pynpaw ka jingai khublei sha kito ki nongsynniang snam kiba la don ïa ka jingkut jingmut ban synniang ei ïa la ka snam na ka bynta ka jingmyntoi jong ki nongpang kiba donkam shisha ïa ka snam. Ka kyntu ruh ïa ki samla pule college kiba la kot 18 snem shaneng ba kin wan shakhmat ban synniang ïa ka snam jong ki. Ka la pyntip ba ki duna bha ki nongsynniang snam na ka liang ki kynthei, kumta ka khot lang ruh ïa ki longkmie ba kin ïashim bynta lang ha kane ka jingsynniang snam.
Kiba la ïoh ïa ki mementos kum ka dak ka jingburom ki kynthup ïa u Ebed Adonai Andronicus Chullai, u Solly Meekway Bareh, u Williambor Sumer bad u Naoo Saki Garod kiba la synniang snam mar 10 sien.
La ai burom ruh ïa ki sengbhalang ne sengtreimon sngewbha kiba kynthup ïa ka Sarot. i man, Jingiaseng Samla Presbyterian Jowai, Occupational Health Centre Dalmia Cement Bharat Ltd, Kur Sookpoh khad Arwyrnai, Dorbar Shnong Chilliang Raij, Seng Samla Unitarian Church, Jowai, Woodland WK Hospital Sabahmuswang, HDFC Bank, Jowai, Department CSR star cement, Khynroo Khyllood Committee Seinraj Jowai, North-East Adventist University, Khliehtyrshi, Deimayatori, Green valley Industries, Meghalaya Cricket Association WJHD, West Jaintia Adventure & Cycling Association, Jowai Civil Hospital, Blood centre, Ae- Deimaya, Seng Samla Katholik Jowai bad ka Indian Red Cross Society, WJHD.
Ha kane ka prokram la ïoh ruh ïa ka jingrwai na u Armanki Nikhla uba na Chilliang Raij, Jowai.
