Ka Jowai Hospital Blood Bank Centre, Panaliar ha kane ka 14 tarik u Jylliew kala leh burom kyrpang ïa kito ki riew shimet kiba la wan ban synñiang snam manla ka por ha katei ka jaka kynshew snam kaba don ha Jowai.
La pynlong ïa kane ka prokram shi bynta na ka jingrakhe ïa ka ‘World Blood Donors Day’ mynta u snem halor ka phang kaba ong “Give Blood, Give Hope: Together We save lives”.
Ha kane ka sngi la donlang da u Additionally SP u Ishan Gupta, IPS kum u kongsan, haba ai jingkren ula pynpaw ïa ka jingsngewnguh kaba khraw ïa baroh kitei ki nongai snam da ka mon sngewbha.
Shuh shuh u Ishan Gupta, ula kren shaphang ka jingjia ba dang shen na ka jinghap jong kawei ka liengsuiñ bad haduh 260-270 ngut ki briew ki la duh noh ïala ka jong ka jingim bad kumba 100 ngut ki briew kila mynsaw bad kane kala buh jingeh ïa ka tnad ka koit ka khiah bad khamtam eh ïa ka kynhun ai jingsumar ba kyrkieh.
Kum ka dak ban leh burom ula khot sngewbha ïa baroh kiba la don bynta lang ha kane ka prokram ban pynlong ka jingsngap jar ba shipor bad ban buh ka jingduwai ïa kito kiba la duh noh ïa ka jingim na katei ka jingjia.
Ula pynsngew ïaka jingeh kaba u ïa kynduh haka por ba u dang don kumba 15-16 snem na ka bynta ka jingdawa snam ka para jong u na ka jingpang bad kum ka ïing ka sem ha kata ka por kila donkam kyrkieh ïa ka snam. Ula ong lyngba kane ka jingjia kala pynshai ha u haduh katno ka jingai snam ka long kaba donkam bad kaba kongsan ban pynim ïa ki mynsiem briew.
Kiwei de kiba ai jingkren ki long u Kingshok Kamal Bora, Co-ordinator CSR Dept. Star Cement, i Dr. I.Khyriem, Sr. Medical & Health officer I/C JCHBC, u Kylli mot Lhuid, Dkhot ka Sarot -I- Man Committed Blood Donor kiba la pynsngew halor ka jingdonkam jong ka jingai snam mon sngewbha.
Ïa kane ka prokram la pynïaid da i Dr. D. Lakiang Medical Superintendent jong ka Jowai Civil Hospital, la ïoh ka jingkren pdiang na u Williambor Sumer, Lab. Technician bad ka jingai khublei na ka kong Memory Lamin (Staff Nurse).
