Ka Khasi Student Union (KSU) Narpuh Circle mynta ka sngi 1 tarik u Naiwieng, 2024 kaka ïoh ban leh burom da kaba ai khusnam (Award) ïa ki 28 ngut ki samla pule ka thaiñ Narpuh kiba pass bah haka kyrdan ba nyngkong (1st Division) haka exam SSLC, HSSLC, Degree bad Master Degree jong une u snem.
La ïathuh kane ka dei ka sien kaba 13 ba ka seng ka la ïoh ban pynkup burom ïa ki samla pule jong ka thaiñ. Kum ka dak ban ai mysiem shuh shuh ïa ki samla pule ban kin dang ïai kiew shaphrang ha ki jingpule na ka bynta ka lawei ba phyrnai jong ki.
Na ka liang u samla Streamly N Suchen President KSU EJHDU ula long kum u kongsan ha kane ka sngi bad u samla Cherity Suja Asst. Finance Secretary KSU EJHDU kum u Symbud kongsan, haka jingdonlang u Principal ka Christian Secondary School Lumshnong u G. Khonglah, u S. Pynkhlong President barim ka KSU Narpuh Circle, u Shaniahskhem Dkhar Finance Secretary KSU EJHDU, u Deniwan Lyngdoh Organising Secretary KSU EJHDU, ki dkhot KSU Narpuh Circle, ki khynnah skul ka Christian Secondary School Lumshnong bad ki nonghikai jong kane ka School.
Haba ai jingkren, u kongsan ula ïathuh ba ka seng KSU naduh ba la seng ïa ka, ka ïeng halor ka nongrim ban kyntiew ïa ka pule puthi bad haduh kane ka khyllipmat ka seng ka dang ïaineh ha ka nongrim.
Ïa ka jingïalang ha kane ka sngi la pynïaid da u bah K.S Suchiang President KSU Narpuh Circle bad ula ai ka jingkitbok kitrwiang ïa baroh ki samla kiba la ïoh ïa kane ka khusnam mynta u snem.
