Ka RC. Eve Secondary School Mihmyntdu kaba dei kawei na ki shlem ai jinghikai ia kiba bun ki khynnah kiba wan na ka long ïing ba duna ka ioh ka kot, ha kane ka 10.09.2024 kala pynlong ia ka programme kaba kyrpang na ka bynta ki khynnah halor ka jingdonkam ka jingnang jingstad ha kane ka juk ba mynta.
Ia ka jingialang la pyniaid da ka Jessica Biam, Headteacher RC Eve Secondary School, Mihmyntdu ha kaba la donlang ruh ka kong D. Lathong, BMC-SSA kum ka kongsan nalor ki dkhot ka School Managing Committee naduh u Father H. Lamare, Secretary SMC, Fedrick Sr. Pushpa Beck Headmaster, Sr. Shella, Principal Don Bosco School, Mihmyntdu bad kiwei.
Ha kane ka sngi la ioh ruh ia ka khana shaphang ka jingtreikam kane ka skul naduh u snem 2013, da ka Manchaki Laloo, Teacher In-charge OOSC Special Training Centre RC Eve Mihmyntdu.
U Rev. Father H. Lamare u la kren ki kyntien nguh blei kumjuh ki kyntien kyntu kynpham ia ki khynnah. Ka Baiahunlang Phawa Assistant Teacher RC Eve SS, kala kren halor ka phang kaba ong Promoting Multilingual Education-Literacy for Mutual Understanding & Peace.
Ka Kong D. Lathong, BMC-SSA, Laskeiñ Block ha ba kren, kala ong ba ka long kaba sngwtynnad ban ioh ban don bynta lang ha kum kane ka programe ryngkat ki khynnah jong kane ka skul bad kumjuh ka ai ka jingsngewnguh sha baroh kiba don bynta ban pyniaid ia kane ka RC Eve Secondary School, Mihmyntdu.
Nalor ki jingkren la pynshongshit ia kane ka sngi da ki jingshad jingrwai, jingiakop dro dur kaba la iashim bynta da ki khynnah jong kane ka skul.