Ka Women’s Welfare Organisation (WWO), Seiñraij Jowai kum ka dak ban ïa snohktilang ban leh burom ïaka International Women’s Day, ha ka 8 tarik u Lber kala pynlong ïa ka jingïakynduh lang hapdeng ki kynthei ha ka jingïalang bala pynlong ha ïing Dorbar Ka Seiñraij, Loompyrdi Iongpiah, ka kong Yoosarda Najiar, District Social Welfare Officer, West Jaiñtia Hills kala long kum ka kongsan, haka jingdonlang u ma EMH Passah, Vice-President Seinraij Jwai kum u symbud kongsan nalor kiwei ki waheh wasian ka Seiñraij Jowai.
Ïa ka jingïalang la pynïaid da ka kong Sooneeta Passah, Vice-Chairperson WWO, Seiñraij la ïoh ka nguhblai na ka Ribeitki Dkhar, Member WWO, katba ïa ki kyntien kyntu kynpham ha kaba ïadei bad kane ka sngi la ai da ka Rilistina Pyrbot, Member WWO Loompyrdi Iongpiah.
Ka kong Rilistina kala pynsngew ïa ki kam babha kiba ka WWO Seinraij kala dep ban synñiang hapoh ka imlang ka sahlang naduh ki snem bala dep hapoh ka jingïalam khmat jong ki nongkitkam ka seng.
Ka la ong ba ki kynthei mynta kiba kiew bha shakhmat ha baroh ki liang bad kane ka dei lyngba ka jingkyrshan jong ki shynrang kiba don ïa ka kyrdan kum u Kñi, u Pa, u lok, u Para bad kumta ter ter bad na ka liang ki kyntei ruh ki donkam ban burom kumjuh ïa u shynrang naduh ïing.
U ma EMH Passah haba ai jingkren ula ong haka kynthei u Blei ula ai kyrpang haka ban kit ïa ka lyngkor naduh ïing haduh ki kam jong ka imlang sahlang. Ula kitbok kitrwiang ïa baroh ki kynthei ba kin ïoh shuh shuh ka jingkyrkhu kyrdoh ha baroh ki liang.
Katba na ka liang ka Yoosarda Najiar, DSWO, West Jaiñtia Hills haba kren kum ka kongsan kala pynkynmaw shaphang ka phang jong kane ka sngi kaba ong “Accelerate Action”, da kaba pynsngew ba ka tnad sorkar ka don ïa ki skim bapher bapher ne ki lad jingïarap na ka bynta ki kynthei.
Haba pynkut ïa kane ka sngi la don ka jingot ïa u Cake bad la ai ruh ki kyntien ai khublei da ka Ridaka Lamar, Secretary WWO Seiñraij, la don ruh ka jingsam ïa ki khusnam sha ki nongjop ha ka Walkathon kiba kynthup ïa ka kong Tipki Chyrmang, ka Panbiang Kyndiah bad ka Queency Passah. Katba ki nongjop ha ka Marathon ki long ka Warisa Sumer, ka Christina Rymbai bad ka Soodawanki Lakadong.
