Ka skul bah North-Eastern Hill University ha ka 15 tarik Risaw 2024 ka la plie paidbah ïa ka Integrated Teacher Education Programme (ITEP) na ka bynta ban pynkiew shaphrang ïa ki nonghikai kiba don sap bad shemphang na ka bynta ban pynïar ïa ka pule puthi ha ki kyrdan bapher bapher.
U Myntri ka tnad Ri jingri ka Sorkar Jylla u Bah Alexander Laloo Hek u la plie paidbah ïa ka Prokram jong ki jait jingpule kiba kynthup naduh ka B.A. B.Ed and B.Sc. B.Ed na ka bynta ka samoi pule jong u snem 2024-25.
Haba ai jingkren ha kane ka sngi u bah AL Hek ula iaroh ïa kane ka jingsdang bad ka jingjam shakhmat ka NEHU ha ka jingkyrshan lang ka Ministry of Education ka sorkar pdeng. U Bah Hek ula batai pynshai ruh halor ka jingthmu jong kane ka prokram ka long ym tang ban pynmih ïa ki nonghikai kiba biang bad shemphang hynrei ban long ruh kum ki nongshong shnong kiba don ka jingkitkhlieh.
Ïa kane ka prokram kaba haduh 4 snem ka ai ka jingtyrwa na ka bynta ki ar tylli ki kyrdan pule ne ka dual-major Bachelor’s Degree, da kaba pynia sohlang bad ka sobjek Education ha ryngkat kiwei pat kum ka language, Social Science, Science, bad ka Mathematics. Kane ka prokram ka bud thik katkum ki kyndon jong ka National Education Policy 2020, da kaba pynleit jingmut ha kaba iadei bad ka rukom ban pynsuk, ka jinglah ban thoh bad pule bun tylli ki jait ktien bad ka jingpyndonkam ïa ka ktien shnong.
Shuh shuh u Bah Hek u la ong ba ka kam nonghikai ka dei ka kam kaba baroh ki burom, hynrei donkam ruh ka jinglong kaba bha, ka akor ka burom namar khlem ka jinglong babha long lehnohei ki kyrdan jingpule.
