Ki nongialehkai athletic jong ka West Jaintia Hills kila long kiba ialehkai bha ha kaba kila ioh ban khur takma ksiar haduh 4 tylli na ki 8 tylli ki jingialehkai ia kiba la pynlong ha ka Pa Togan Nengminza athletic stadium ha ka sngi Wednesday.
Ka Ri Bhoi ruh kam shym la sahdien eh ha kaba ki ruh ki la ioh ban khur 2 tylli ki takma ksiar, katba ka South West Khasi Hills bad ka East Khasi Hills ki la ioh ban khur tang mar iwei i takma ksiar.
Ha ka jingiakop Men’s 5000 meters race u Dabit Dkhar jong ka WJH ula lah ban pyndep ha ka por 15:53:9 bad pynliem ia u Banjoplang Wanniang jong ka WKH uba la slem 6 sekhon. Ia ka takma la ioh da u Iwelljohn Ramsiej uba la lah ban pyndep ha ka por 16:00:2.
Ha ka liang ki kynthei ha kane ka juh ka jingjngai ka SWKH kala ioh ban khur ia ka takma ksiar bad takma rupa lyngba ka Lyntijingkyrmen k Jahrin kaba lah ban pyndep ha ka por 19:55:2, ka Marqueenless Ramsiej ka la lah ban pyndep ha ka por 20:03:2, katba ka Happiness Phawa jong ka WJH kala khur ia ka takma rnong ha kaba kala lah ban pyndep ha ka por 20:36:7.
Ha ka jingiakop women’s long jump, ia ka takma ksiar la ioh rah da Joytiful Narlong jong ka Ribhoi kaba jump haduh 4.56 m, ia ka takma rupa la ioh da ka Savinity Jyndiang jong ka WKH (4.46 m) bad ia ka takma rnong la ioh da ka Shidalin ROngpih (4.38 m).
Ha ka jingiamareh 400 m ki shynrang ka WJH kala ioh khur ia ka takma ksiar lyngba u Kyrshanlang Shylla u ba la lah ban pyndep ha ka por 50.3 second. U Donbok Shabong jong ka EKH ula ioh ia ka takma rupa katba u Kalbin Marak jong ka EGH ula ioh ia ka takma rnong.
Ha ka liang ki kynthei (400 m) ka Retina Hanse jong ka Ri Bhoi kala khur takma ksiar ha kaba ka la lah ban pyndep ha ka por 1:01:5, ka Damika Lyngdoh jong ka WJH kala ioh ia ka takma rupa ha kaba ka la lah ban pyndep ha ka por 1:03:9 bad ka Albamery Sohshang jong ka WKH ka la ioh ia ka takma rnong ha kaba ka la lah ban pyndep ha ka por 1:08:4.
Ha ka long jump u Renaldi Dhar jong ka WJH ula khur ia ka takma ksiar da kaba rynsied haduh 6:34 meters, u Makdonal Mahjong jong ka Ri Bhoi (6.34 m) ula ioh ia ka takma ksiar bad u Chelchak Sangma jong ka EGH (6.13 m).
Ha ka jingiameh 4×100 m relay race jong ki shynrang ka WJH kala ioh khur ia ka takma ksiar kaba la pyndep ha ka por 45.3, ka EKH ka la wan ba ar kaba la pyndep ha ka por 47.0 katba ka WGH kala wan balai (47.0) kaba la pyniapher tang da ki mili second hapdeng kine ki ar kynhun.
Ka jingialehkai kaba khadduh ka long ka 4×100 m relay race jong ki kynthei ha kaba ka EKH ka la ioh ia ka takma ksiar, ka Ri Bhoi ka la khur ia ka takma rupa bad ka WJH kala khur ia ka takma rnong.