Ka Jaiñtia Natioanal Council (JNC), mynta ka sngi 10.07.2024, ka la ioh ban pynlong ia ka jingleh kmen kaba iphuh iphieng halor ka jingdap khyndai snem pura jong ka jingshakri jong ka seng na ka bynta ka ri bad Jait bynriew. Mynta ka sngi ka seng ka la ioh ruh ban pyllait paidbah ia ka Music Video kaba la thaw bad rwai hi da ki dkhot jong ka seng kaba la ai kyrteng ka “Ri Jaiñtia”. Ia kane ka Mucis Video la pynllait paidbah da u ma Bishar bha Pala uba long kum u kongsan ha kane ka sngi.
U President rangbah ka seng u samla Sambormi Lyngdoh, haba ai jingkren u la ong ba u dap da ka jingkmen kaba khraw ban ioh ban rakhe ia kane ka sngi ba kyrpang jong ka seng, u la kren ruh halor lai tylli ki mat kita ka tip briew tip blei, tip kur tip kha bad ka kamai ia ka hok, u la ong ia kine lai tylli ki mat la pynshong nongrim kum ki lai tylli ki maw bynna kiba don ruh ha u Logo jong ka seng. Na ka liang jong u, u la kyntu jur ia ki dkhot jong ka seng bad ia baroh lang ba dei ban bud ia kitei ki kyntien kiba la buh na duh u barim ba jah. U samla Sambormi u la iathuh ruh ba naduh ba ka seng ka la sdang ban iaid lynti ka la kynduh shibun ki jingeh hynrei hapdeng ki jingeh ka seng ka ieng beit triang bad ka la lah ne dep ruh ban leh shibun ki kam kiba iadei bad ka bha ka miat haka imlang sahlang.
Na ka liang u Kongsan u ma Pala u la ai kyntien kyrkhu kyrdoh ia ki nongialam bad nongkit kam jong ka JNC kiba la iaid lynti haduh khyndai tylli ki snem, u la ai ruh ka jingkyrkhu ia baroh ki dkhot jong ka seng ba kin nangiai kiew nangne shakhmat ha ka jingiadei bad ka jingshakri jong ki ia ka ri bad ka jait bynriew.
Mynta ia ka ia ka jingialang la pyniaid da u samla Mehi Rymbai uba long u Secretary ka tnat Arts and Culture JNC-CEC bad la ioh ia ki jingkren na u samla Ency Shadap Vice President JNC CEC, samla Wanshwa Suting General Secretary JNC-CEC, samla Jershom Shylla President JSU, samla Leningstar Rymbai President JSM, ki Waheh shnong bad kiwei de. La pynshongshit ruh ia kane ka sngi da ki jingrwai bad shad kiba la shim bynta da ki samla kynthei jong ka seng na Jalaphet Circle.
