Ka Seng Hynniewtrep National Youth Front (HNYF) East Jaintia Zone, hapoh ka jingialam jong u President ka Zone, Bah Satly Ryngkhlem, ha kane ka sngi Balang ka la leit ban ai jingiarap sha ki khun swet kiba don ha Shnong Wapung, hapoh ka dong Ionĝ Ryngkhlem Shwar. Kane ka jingiarap ka long kum shi bynta jong ka jingkitkhlieh bad jingkloi ka Seng ban iaiban bad ban kyntiew ia ka imlang sahlang jong ki paidbah, khamtam ia ki khun swet.
Ha kane ka sngi, ka kynhun jong ka Seng ryngkat ki nongialam ka District, ki kur ki kha bad kiba ha ïng ha sem jong kitei ki khynnah ki la ia donlang ban sngap jar, ban sakhi bad ban shim bynta ha kane ka jingai jingiarap kaba la buh ka jingmut kaba kyrpang. U Bah Satly Ryngkhlem u la pynpaw ruh ba ka jinghiar ka Seng sha katei ka jaka ka dei ban ai mynsiem ia kitei ki khun swet ban um duh jing kyrmen ba kin nang sngew ba ki long kiba don ka dor, bad ba ka imlang sahlang ka dang kloi ban pyrsad lem bad ki ha ka por jingeh.
Ka Seng HNYF East Jaintia Zone ka la ju trei shitom ban leit jngoh, leit iarap bad leit peit bniah ia ki jingdonkam jong ki paidbah, naduh ki por ba la leit noh. Ka jingai jingkyrshan ha kine ki bynta ka dei tang shi bynta na ka thong jong ka Seng ban ai jingiarap na ka bynta ka bha ka miat jong u paidbah, katkum ka bor katba long katba lah.
Ha kane ka jingialang, la pynshlur ruh ia ki para paidbah ban don ka jingiatreilang ban iarap lem ha ki jingdonkam kiba ktah ia ka imlang sahlang, khnang ba ki khynnah bad ki longïing longsem kin lah ban im ha ka jingkmen bad jingsuk. Pynkut ka kyrwoh na u President ka HNYF East Jaintia Zone, Bah Satly Ryngkhlem.
