Ka seng Meghalaya People United Front (MPUF) East Jaintia Hills District, mynta ka sngi ka la leit ban ai jingiarap sha kawei ka longiing kaba dei jong ka kong Dymmai Nongtdu kaba la ngat ha ka jingjia pluh ding ha ka shnong Ladrymbai Dongwah kaba la jia ha kane ka sngi thohdieng jong 25.02.2022, ha ka por kumba 2 baje ei ei noh phai sngi ha kaba ka ding ka la ioh ban ban bam lut ia ki jingdon jingem baroh khoit kiba don ha katei ka iing.
Ha ka jingiadei bad kane ka jingjia donbok ym shym don ka jingduh jong ki mynsiew briew, hynrei kat kum ka jingiathuh jong ka kong Nongtdu ka la ong ba ha kane ka jingjia ka ding ka la ioh ban bam lut nadong sha dong ki jingdon jingem jong ka bad kumba long mynta kam don shuh ia ka jaka sah jaka dem bad kumjuh ki mar jingdonkam. Na ka liang jong ka kong Dymmai ka la pynpaw ruh ka jingsngew nguh ia ki nongialam jong ka seng kiba la wan shakhmat ha kaban ai jingiarap ia ka kum ha kane ka por.
Mynta ka sngi ha kane ka jingleit ai jingiarap ka seng la don lang u samla K. Blah President MPUF EJHD, u samla D. Laloo President Sengkmie MPUF, ha kaba na ka liang jong ki, ki la pynpaw ka jingsngewsynei ia kane ka long iing jong ka kong Dymmai kaba ia kynduh ia kum kane ka jingeh khlem poi pyrkhat, kane ka longkmie ka don ruh hynriew ngut ki khun bad ka dei ruh tang ma hi ka nongkamai. Na ka liang ki nongialam jong ka MPUF mynta ka sngi ki la ai jingiarap sha kane ka longiing da ki tin sop iing, ki tiar shet tiar bam ryngkat ka song pisa.
Na ka liang u President ka EJHD u samla Blah u la kyntu ruh ia kiwei de ki sengbhalang ba kin wan sha khmat ha kaban iarap ia kum kine ki briew kiba shem lanot ne ia kynduh jingeh, shuh shuh u kyntu jur ruh ia ki nongmih khmat naduh ki MDC, MLA bad kiwei kiba dei peit ia kane ka thaiñ ba ki dei ban wan ai jingiarap kloi ia kum kine ki briew kiba ia kynduh ia kum kine ki jingeh.