Ka Rotary Club Jowai (RCB), hynne ka sngi 26.12.2023, kala leit ban ai iarap da ki blanket sha kiba shah sumar ha ka Halfway Home, kaba don ha Sabahmuswang, West Jaiñtia Hills, kaba long kawei na ki jaka sah jong kito ki don ka jingshitom ha ki bor pyrkhat pyrdaiñ kaba la pyniaid da ka Society for Urban and Rural Empowerment (SURE), kawei na ki seng treimon sngewbha, mynta ka sngi la don lang ruh u President bad u Vice President ka Rotary Club Jowai.
U Dr. H.H. Mohrmen, Secretary ka SURE, haba kren u la iathuh ia ka jingiaid lynti haduh ba la lah ban pynurlong ia kane ka Halfway Home, kaba ki la iakynduh ruh shibun ki jingeh ha kiba bun ki liang.
Na ka liang u Rotarian S.K. Lato, Vice President ka Rotary Club Jowai, u la ai ka jingiaroh ia ki dkhot jong ka SURE, kaba la lah ban pyniaid ia kane ka kam lyngba ka jingshakri ia kito kiba shitom ha ka jingpyrkhat pyrdaiñ, u la dap ruh da ka jingsngewkmen haba ka RCJ kala ioh ban ai ia kane ka jingiarap sha kane ka jaka.
Ha kane ka sngi la ioh ruh ia ki jingkren na u President ka Rotary Club, u Rotarian Deibormi Toi uba la ai ka jingiaroh ia ka SURE ha kaba u la ong ba na ka liang ka Rotary Jowai kan ai shu ki jingiarap katba lah ka bor. La ioh ruh ki jingkren na ka Niwanka Shylla, Project Coordinator ka Halfway Home, Rotarian E. F. Gatphoh, Charter President RCJ ha ka jingiadonlang kiwei de.