Mynta ka sngi ki dkhot bad nongialam jong Ka Synjuk Waheh Chnong Jowai kum shi bynta na ka jingrakhe ia ka Republic Day, kila hiar sha ka shnong Nartiang na ka bynta ban ai jingiarap ia ki 14 ngut ki khunswet kynthei kiba la ri bad sumar da ka World Mission Children’s Home (Girls) ha Nartiang. Ia kane ka Synjuk kala leh hadien ba ka la iohbor na ka ophis jong u Deputy Commissioner West Jaintia Hills District.
Ha shwa ban sam ia ki mar bam bad mar kawei ka Kombol sha kitei ki khynnah kala don ka jingialang kaba lyngkot ba la pyniaid da u President ka Synjuk u ma Alan Niangti. U ma Niangti ula pdiang burom ia baroh ki dkhot jong ka Synjuk kiba la iapoi lang bad ruh ia ki nongpyniaid bad nongsumar jong kine ki khynnah khunswet.
La ioh ia ka jingkren lyngkot na ka kong Sonia Pala kaba dei ka Superintendent jong kane ka jaka ri khunswet, kaba la iathuh lyngkot ruh ia ka khana naduh bala sdang ia kane ka jaka ri khunswet ha u snem 2018 bad hapdeng ka jingiaid lyngti kaba eh.
La ioh ruh ka jingkren na u General Secretary ka Synjuk u ma Riquoma Rq. Laloo, uba la kren shaphang ka jingmut jong ka sngi Republic Day bad ula ai khublei ruh ia ka District Administration, West Jaintia Hills kaba la ai bor ia ka Synjuk ban pyndep ia kane ka prokram. U ma Laloo ula ai mynsiem bad sneng kyntu ia baroh ki khunswet da kaba ong ba kim dei ban sngewkhunswet ialade namar hangne ki don ki nongri nongsumar kiba long hi kum ki kmie ki kpa jong ki. U la pynpaw ba ka Synjuk ka kloi ban ai ka jingiarap ha kino kino ki por ba ki donkam. U la ban jur ba kin long ki khynnah kiba don akor burom naduh ka jaka sah haduh ha bar kumjuh, khnang ban ioh ka jingiaroh na ki ba bun ba lang. Ula kyntu ruh ia ki nongri nongsumar jong kine ki khunswet ba kim dei ban peit shilliang iano iano hynrei ban ri bad sumar salonsar ha baroh ki liang.
La ioh ruh ka jingkren ai khublei na u ma James Pohsngap uba dei u Asstt. Waheh Chnong ka Khim-U-Sniang. Hadien kane la ioh ia ka jingsam ia ki tiar sha kine ki khynnah da ki Waheh Chnong bad ki nongri nongsumar jong ki khynnah.
