Ki nongialam jong ka Jaiñtia Students’ Union (JSU) ki la leit ban iashimbynta ban ai ka jingkyrshan ia ka Khasi Author Society (KAS) sha nongbah New Delhi ban ai jingkyrshan ia ka seng ban dawa na ka sorkar India ban ithuh noh ia ka ktien Khasi hapoh ka khyrnit kaba 8 jong ka riti synshar ka ri India.
Ha kane ka jingialang la wan shim bynta lang naduh ki Myntri sorkar kynthup ia i Kong Ampareen Lyngdoh bad i Bah Paul Lyngdoh bad la iadon lang naduh ki MLA bad MDC ka KHADC bad lah shim bynta lang ban ai jingkyrshan da ki kynhun sengbhalang ka KSU, JSU, FKJGP, HYC, CORP bad ka HANM.
Ka KAS ka la pynlong ia kane ka jingialang paidbah ha Jantar Mantar ha nongbah New Delhi bad na ka liang ki nongialam ka JSU ki la wan iashim bynta shit rhem naduh u President Rangbah ka seng bad u General Secretary u samla Treiborlang R Suchen bad u samla Jersom u la ai ruh ia ka jingkren ha kane ka sngi da kaba ong lada ngi iatylli kumne naduh ki Myntri sorkar haduh ki MLA ,MDC bad ki sengbhalang ngin lah ban jop ia ki daw bah ka jaitbynriew khlem ar tatien wat ia u lum ki lah ban pait bad u la iaroh ruh ia ka KAS ba ki lah shisha ban wanrah ia ka jingtylli lyngba ka jingdawa ban pynrung ia ka ktien Khasi hapoh ka khyrnit kaba 8 jong riti synshar ka ri.
