Ka Jaiñtia Youth Federation (JYF) Jowai Circle hynnin ka sngi ka 4/3/2022 hapoh ka jingïalam jong u President u samla N. Jordan Rymbai ka la ïoh ban leit ai jingïarap ïa kawei ka longïing ha shnong Barato West Jaiñtia Hills kaba mad ïa ka jingjia sngewsih namar ka jingpluh ding.
Ha kane ka sngi ka seng ka la ïoh lad ban ai jingïarap da ki marbam mardih bad kynthup ia u khaw, kaba long kum shibynta ban sngewlem ïa ka jingduh noh jong katei ka longïing ïa ka ïing sah jong ki.
Na ka liang ka seng ka la ai ka jingkyrkhu kyrdoh ïa kane ka long ïing ba kim dei ban duh jingkyrmen hynrei ki dei ban shaniah ha U Blei namar U tip lut ïa ki jingdonkam jong ki kum ka ïing ka sem.
Na ka liang jong ka kmie jong kane ka longïing haba kren kam lah khlem da sngewnguh ïa ka seng JYF ka ba la kloi ban kner ïa ka kti jingïarap sha ki bad ka kitbok kitrwiang ïa ka seng ban nang ïai trei shitom na ka bynta ka ri bad ka jaitbynriew khnang ba kan nangkiew shaphrang ha ki kam babha jong ka.