Ka Jaintia National Council (JNC) Khliehriat Circle mynta ka sngi ka la leit buh ia ka jingujor jong ka sha u Branch Manager ka HDFC Khliehriat Branch. Ka JNC-KC hadien ba ka la ioh ia ka jingujor na ki paidbah ba bun balang ba ka HDFC ka tuh palat ia ka por jong ki paidbah. Namar haba ki paidbah ki wan ban shim loan na ka bank HDFC Khliehriat Branch ka bank ruh ka la long kloi ban kular ai loan ia ki customers jong ka, da kaba ki customers ki hap ban pyndep ia ki kyndon bapher bapher jong ka bank ha ryngkat ka jingpynbiang ia ki kot ki sla ba biang kiba bapher bapher bad siew ruh ia ki jingdonkam na ka bynta ban ioh loan ha Ki bynta ba don kam.
Hynrei na ka liang jong ka HDFC bank pat hadien ba ka lah dep ban buh por buh tarik ban pyllait ia ka loan jong ki customers ha ka tarik ba ka bank ka lah ong, hynrei yn da lah poi kata ka por pat ka ai daw pat da kumwei kumwei bad ka bank ka ong pat ba ym pat lah ban pyllait ia ka loan jong ki customers bad ka pynsahteng da ki bnai bad kane ka iai shi iai bteng ban long kumne bad kane ka ktah ia ka por jong ki nong applai loan namar ba ki hap ban wan shi wan sha HDFC bank bad kane ka ktah ruh ia ka jinglut jingsep, ka por ka dier jong ki customers bad kiwei kiwei.
Nalor kata ruh ha kaba ka interest rate ruh ha ka por ba sdang ia kren ban shim loan na ka HDFC bank, ka bank ka kular ha ka dor kaba rit bad kaba khring ia ki briew ban shim loan hynrei ynda lah dep leh ia kiei kiei baroh kiba don kam ka bank ka kylla pat da kumwei hadien da kaba pynheh ia ka interest rate bad kane ruh ka pynkulmar ia kiba applai loan la ong U bah Symboh Sumer publicity Secretary JNC-KC
Ym tang katta wat ia ka tenure ruh lane ia ka por ba lah buh da ka bank ba u nongshim loan U dei ban siew dep hapoh ka por ba la buh, ia kane ruh ka bank ka pynkylla pat hadien da kaba pynkloi na ka por ba la dep buh shwa bad kane ka buh jingeh ia ki nongshim loan, nalor ba ia ka loan ruh ka bank kam lah ban pyllait ha ka por ba lah dep buh por da ka bank.
Ka JNC-KC ha ha ka jingiakynduh bad u Manager ka HDFC bank Khliehriat Branch ka la kyntu ia U ba dei ban pynbeit ia kine kiei kiei baroh khnang ban pynsuk ia U paidbah pynkut U Symboh publicity Secretary JNC-KC la phah ruh ia ka copy sha u Deputy Commissioner East Jaintia Hills District, na ka bynta ka jingtip ban ban leh ia ka ba don kam.