Ka JSU Sengkmie (Central Body) mynta ka sngi hapoh ka jingialam u samla Dapmain Suchiang uba long u Publicity Secretary Central body ryngkat u Finance Secretary Central Body u Treki Mukhim kem bad katto katne ki dkhot ka seng ki la leit ia kynduh ia u Myntri ka tnat pule puthi jong ka sorkar Jylla, u Rakkam A Sangma, na ka bynta ban iakren halor ka jingslem palat ka sorkar ban pynioh ia ka Pension jong ki nonghikai skul Lower Primary kiba la shongthait naduh u snem 1995.
Naliang ka Seng ka lah ia kren sani bha bad u Myntri halor kane ka issue kaba lah sahteng da ki phew snem. La pyntip ha khmat u Myntri ba kila don ki nonghikai LP Skul kiba la dep ban shongthait na ka kam hikai (Retired) naduh u snem 1995 haduh u 2020 hynrei kim pat ioh satia ia ka Pension ne ka baibam tymmen jong ki haduh kine ki sngi. La iathuh ba kine ki nonghikai skul ki don da ki spah ngut.
Ha ka jingiakren bad ka Seng na ka liang jong u Myntri u la kular ban shimkhia noh ia kane ka mat kaba donkam bha.
Na ka liang ka JSU ka ong ba kan iaid bud dien halor kane ka kam, khnang ba ki nonghikai ba la shongthait kin ioh noj ia la ka jong ka hok.