Ka khubor ba la phah mynta ka sngi la iathuh ba u Chief Executive Member (CEM) ka Khasi Hills Autonomous District Council (KHADC), u Bah P.S. Syiem, u Deputy CEM, Bah P.N. Syiem lem bad ki dkhot ka Executive Committee, ka KHADC hynnin ka sngi ki la leit ban ia kynduh ia u Lat ka Jylla Meghalaya u Phagu Chauhan, ha jaka treikam jong u ha Raj Bhavan Shillong.
Ha kane ka jingiakynduh, la pynsngew ha u Lat ia ka rukom trei kam ka KHADC bad ka jingkitkhlieh katkum ka jingpruiddak kaba la kdew ha ka 6th schedule jong ka riti synshar (Constitution) ka ri India. U CEM ula ai ruh ha u Lat ka jylla Meghalaya ia ka jingpynithuh bniah ia ki 54 tylli ki Elakas/Himas kiba hap hapoh ka Council, ryngkat bad ki jingpyni bniah bad batai bniah shaphang ki Syiemship, Lyngdohship, Sidarship bad ki Wahadarship bad ka kamram treikam ka jong ki.
U CEM bad ki dkhot ka KHADC ki la ai khublei bad ka jingsngewnguh ia u Lat namar ka jing kyrshan bad jingmynjur jong u ia ka Bill ba la pynbeit biang ha ka sien kaba ar (Second Amendment) Regulation Act, 2021 kaba long ka Khasi Hills Autonomous District (Establishment, Management, bad Control of Markets) bad kiwei pat ki Bill ba la shna da ka KHADC.
Nalor kane, u CEM, uba la mih khmat ia ka Executive Committee, u la khot sngewbha ia u Lat ban leit jngoh ia ka council, ia kaba ka jingkhot kat kum ka rukom ba dei ban leh yn sa phah shen sha u.