Ka FKJGP Shangpung Unit, mynta ka sngi hapoh ka jingïalam jong u President u Pynbiang Chullet, ka la leit ban ïakynduh da kaba rah ryngkat ka jingthoh ban aiti ha ka Medical Officer I/c Shangpung Primary Health Centre ha ka jingsynran lang u Legal Secretary ka FKJGP Jaiñtia Hills u Leader Paia Dkhar, u Vice President ka FKJGP West Jaintia Hills u Wompher Wann bad u Assistant Secretary ka FKJGP West Jaintia Hills u Nangkhraw Rani.
Kane ka jingleit ïakynduh jong ka FKJGP ïa katei ka incharge ka long long halor ka jingtlot palat ka rukom treikam jong kane ka PHC khamtam ha ki por mynmiet.
Ka seng ka pynkynmaw ba ha ki por ba dang don ka Dr. Ebiangmi Challam (retired), Doctor Teibok Wann bad kiwei ki Doctor, ki long kiba trei shitom bha na ka bynta ki paidbah nongshong shnong ka Shangpung bad ki shnong ba marjan.
Ka FKJGP kala ong ba kan ïai bud dien ïa kane ka jinglong tlot jong ka rukom treikam kane ka PHC. La pynpaw ruh da ka seng ba kane ka jaka sumar ka long kaba duna ki Dorctor bad ki nongtrei bad kala dei ïa ki bor ba dei peit ban pynbiang ïa baroh ki jingdonkam jong kane ka PHC.
Ha ka juh ka por ka seng ka pynpaw ha ka kyrwoh ba kan sa bteng ban leit jurip sa ïa kiwei de ki tnat sorkar kiba don hapoh ka shnong Shangpung pynkut ka kyrwoh na u President Shangpung Unit.