Mynta ka sngi u Lamphang ka ïing Dorbar thaw aiñ ka jylla u Thomas A Sangma ula ïakynduh ïa ka kynhun jong ka Bharti Institute of Public Policy (BIPP) bad ka Indian School of Business (ISB) kiba kynthup ïa ka Dr Aarushi Jain, Policy Director; Ms Deepti Soni, Associate Director bad ka Ms Amrita Chakraborty, Project Lead, India Data Portal, ha nongbah Shillong.
Ha kane ka jingïakynduh kane ka kynhun kala pynshai ïa u Lamphang shaphang ka Meghalaya Data Portal (MDP) ) www.meghalayadataportal.com. Kane ka MDP ka dei kawei na ki byta jong ka India Data Portal (www.indiadataportal.com) kaba trei na ka bynta ban pynïar ïa ka jingïadei ha ka jingkyntiew ïa ka jingshna ïa ki aiñ ki kanun.
Ka jingdon jong kine ki thup kan ïarap shibun ban pynïoh jingmyntoi ïa kino kino kiba don bynta ha kane ka kam, kum ka jingwat bniah, ki nongthaw aiñ, ki nongpule, ki nongthoh khubor bad wad ïa ki riew paidbah hi ruh.
Na ka liang jong u Lamphang ula ïathuh ruh halor ka jingïaid shaphrang ka Meghalaya Legislative Training Programme, kaba dei kawei na prokram ai jinghikai na ka bynta kito ki nongmihkhmat paidbah kiba la shah jied sha ka Meghalaya Legislative Assembly.
Ha kane ka sngi kane ka kynhun kala ïoh lad ruh ban ïakynduh ïa u A.T. Mondal, u myntri ba peit ïa ka bor pynmih ding bad Khajna, kumjuh ïa u myntri ka pule puthi u Rakkam A Sangma bad ruh ïa ki dkhot ka Legislative Assembly u Subir Marak, u Ian Botham K Sangma bad u Arbinstone B Marak.
Ka kynhun jong ka Bharti Institute of Public Policy (BIPP) kala wan jngoh kyrpang ïa ka jylla Meghalaya ha kane ka taïew na ka bynta ban kren sngewthuh shuh shuh halor ka jingïatreilang ka sorkar jylla bad ka Bharti Institute, ISB.