Hadien 13 sngi ba bteng ka jingiakhih shah thngan ki samla pule NEHU ha phyllaw kane katei Skulbah, u Vice-Chancellor In-Charge, ka North Eastern Hills University, u Prof Nirmalenda Saha, mynta ka sngi u la leit ban iakynduh ia ki samla pule jong katei ka Skulbah.
Ha ka kyrwoh ba la phah da u Prof. Nirmalenda Saha, u la ong ba hadien ba u la shimti ia ka kam, ka jingthmu ba kongsan ka long na ka bynta ka jingbha jingmiat jong ki samla pule, kiba long ka dohnud bad ka mynsiem jong ka NEHU.
“Nga la iakynduh hi dalade bad ki samla pule, da kaba pynpaw ia ka jingsngewkhia kaba jur ia ka koit ka khiah bad ka jingbha jingmiat jong ki, khamtam haba dang iaid ka jingshah thngan” u la ong.
Shuh shuh la bynrap , “Wat la nga la pyrshang katba lah ban pynsngewthuh ia ki ban pynsangeh noh ia ka jingiakhih jong ki, nga dang don ka jingkyrmen ba lyngba ka jingiakren bad jingiasngewthuh jingmut lang, shen lah ban poi sha ka jingpynbeit”.
“Nga la don ka jingiakren man ka por bad ka kynhun doktor bad ki doktor kiba buddien ia ki samla pule kiba shah thngan. Ka koit ka khiah jong ki ka long ka jingkhuslai kaba khraw tam jong nga, bad nga duwai jur ba kan ym mih kano kano ka jingeh kaba jur ha ka liang ka koit ka khiah” u la ong .
U la iathuh ruh ba “Nga la pynlong ruh ïa ki jingïalang kiba bniah bad ki nongïashim bynta bapher bapher, kynthup ïa ki nongmihkhmat jong ka Synjuk jong ki Samla Pule jong ka NEHU (NEHUSU), ka Seng jong ki Nonghikai bym dei ki nonghikai jong ka NEHU (NEHUNSA), bad ka Seng jong ki Nonghikai jong ka NEHU (NEHUTA)”.
Kine ki jingiakren ki la long kiba tei bad kiba iatreilang, bad nga sngewkmen ban iathuh ba ka NEHUNSA ka la mynjur ban ailad ia ki katto katne ki bynta ba kongsan jong ka synshar ban sdang biang ia ki kam. Kane ka sienjam kaba kongsan ka pynthikna ba ki scholarship kin long kiba la pyntreikam bad ba ki kam pule puthi kin ïai bteng khlem jingpynthut.
Ban weng ia ki jingeh ba kongsan, la thaw ia ka Komiti tohkit kaba kynthup ia ki nongmihkhmat na baroh ki nongshim bynta ba kongsan. Ka komiti ka dang trei shitom ban pyndep ia ka kam kaba dei ban leh, bad ia ki jinglap jong ka yn sa aiti sha ka komiti ba la thaw da ka tnad pule puthi.
“Nga sngewnguh ia ka jingaiti bad jingpyrshang jong baroh ki dkhot kiba don bynta ha kane ka kam bad nga kyntu ia baroh ban kyrshan ia ka kam jong ki ha ka mynsiem jong ka jinglong kaba shai bad kaba don jingkitkhlieh” u la ong biang.
“Nga ngeit skhem ba ka jingbha jingmiat jong ki samla pule ka dei ka jingsngewkhia kaba kongsan tam jong ngi. Kum ka skulbah, ngi don ban pynroi bad pynkupbor ia ki samla pule jong ngi, bad nga pynthikna ia phi ba man la ka rai ba la shim ha kane ka por kan buh hakhmat eh ia ki jingmyntoi jong ki. Nga kyrpad ia baroh ki dkhot jong ka imlang sahlang jong ka NEHU ban iawan lang, ban buh sharud ia ki jingiapher, bad ban pynleit jingmut ha ka thong ba iatylli ban tei ia ka jaka pule kaba iadei bad kaba roi” u la bynrap.
U la ong ruh ba kin iai bteng ban leh ia kaba don ha ka bor jong ngi ban pynthikna ba ki samla pule kin ym shah ktah bad ba ka jingpule bad ka lawei jong ki kan long kaba la iada da kaba kdew ba ka jingiatreilang sha ka NEHU kaba kham shai bad kham iatylli.