Haka 6 tarik jong u Kyllalyngkot 2023 ka Hynniewtrep Border Disputed Redressal Forum (HBDRF) ka la thom ïa ki riat ki ram ki rai eh raidam bad leit hiar shaduh sha ki shnong kiba kyndong tam kiba don hapoh Elaka Labang Nangphyllut bala tip kum ka Block -I. Ki shnong kiba ka seng kala ioh ban leit jngoh ki kynthup ia ka Moorap, Mooriap, Syrlong, Laher, Umsalait, Mynju, Mookhim, Bandeiñ, Mooknor, Khyndeliar, Madan myn-i bad Mynriah, kine ki shnong kidei kiba kyndong tam kiba duk tam bad kiba sahdien tam na baroh ki shnong kiba shong basah daki jait bynriew Khasi Pnar. Ki shnong ki bym pat don ïew don hat bording, umbam umdih, surok lynti syngkieng skul, jaka sumar pang bad kino kino ki kam pynroi (Development). Ka jingleit jngoh bad pynlong jingïalang jong ka Forum sha kine ki shnong ka long ban pynsngew thuh ïa ki shaphang ka nongrim bad ka jingshisha halor ka jingdawa jong ki ban re-transfer biang ïa kane ka thaiñ sha Meghalaya. Ban pynshlur bad aibor ai mynsiem ïaki ba kin long kiba iaineh bad ïaishah haka jingïaid lynti jong kane ka kam, ban wanrah ïa ka jingsngew ïajuh ïajan hapdeng ki paid Khasi Pnar. “Lada ngi don ha ei ei, ka jaitbynriew dei tang kawei ” la pynpaw ka seng.
Iaka jingialang la pynïaid da i Kong Purity Phawa Secretary jong ka Forum, la ïoh ïa ka jingkren da u Chandame Sungoh Chairman jong ka Forum, Bah Thomas Passah Senior Spoke – Person bad na ki riew rangbah jong kane ka thaiñ u Phrit War bad u Tuner Lyngdoh. La ïoh ruh ban sam bad ai sngewbha da ki jaiñ sha kine ki nongshong shnong jong kane ka thaiñ ia kaba la ai ban synniang sngewbha da ki katto katne ngut ki paralok badon mynsiem.
Ki pait nongshong shnong jong kane ka thaiñ kila pynpaw ïa ka jingkwah jingthrang bad jingkut jingmut ban don beit sha Meghalaya kumba juh long naduh hyndai hynthai kulong kumah. Ki la hun bad kut jingmut ban ym pdiang shuh ïa kino kino ki Grand ki Scheme na ka Sorkar Assam kat bym pat tikna u pud u sam wat lada ka wan da ka ba phon ba pah lane da ka pynbor. Ki kyrpad ruh ïa ka Sorkar Meghalaya ban pyndep kloi ïa kane ka kam pynbeit pud khnang ba kan ïaid beit ka synshar khadar ban ban wanrah ïa ka shongsuk shong saiñ, ka roi ka par.
Ki nongkren na ka Forum ki pynpaw ka jingsngewkhia kaba jur halor kane ka jingeh kaba khrawtam baki paradoh parasnam kiba shong basah sha kine ki thaiñ ki ïakynduh bad kular ruh ban ym iehnoh ïa ki la ha kano kano ka por lane la ha kano kano ka jingeh jingdonkam ba ki ïa kynduh.