Ka lok jong u Lat ka jylla ba mynta u Brig. (Dr.) B.D. Mishra (Retd.), ka Neelam Misra mynta ka sngi kala leit ban jngoh ia ka National Institute of Fashion Technology (NIFT) kaba don ha Umsawli bad jurip ia kane ka jaka pule bad iasyllok ruh bad ki samla pule kane ka jaka ai jinghikai halor ki riam ki beit.
Haba iakren bad ki samla pule kane ka jaka ai jinghikai ka Misra kala iathuh ia ki jingtip jong ka sha kine samla pule bad kala khot ruh ia samla ban pynneh pynsah ia ki jait riam tynrai jong ka thaiñ, ha kaba ka khmih lynti ba yn lah ban pyniaid iew ia kine riam tynrai sha kiwei de ki bynta jong ka pyrthei.
Kala ioh ruh ban ai shibun ki jubab kiba la kylli da kine ki samla pule kane ka Institute. Kala ong ruh ba ka jaka thaiñ jaiñ kaba don ha jylla Arunachal Pradesh ka long kawei na ki jaka kaba ai mynsiem ia ki nongthaiñ jaiñ. Ka Misra kala iohlad ruh ban leit jngoh ia ka Silk Village kaba don ha Umden-Diwon, Ri Bhoi District ban ioh jingtip halor ka kam pynmih ksai (eri-silk) bad thaiñ ia ki jaiñ tynrai.
