Hadien ba la ioh ia ka jingmynjur bad pdiang da ka All India Education Council for Technical Education (AICTE) ha ka 14 tarik mynta u bnai na ka bynta ban plie noh ia ka Shillong Government College of Enginering College, kaba don ha Mawlai Kynton Massar kaba dei ruh ka Engineering College ba nyngkong ha ka Jylla ba la pyniaid da ka Sorkar, u Myntri Rangbah ka Jylla, Conrad K. Sangma u la leit ban jngoh ia katei ka Shlem pule ha ryngkat ka jingsynran lang ki ophisar ka Tnad Pule puthi ka Jylla, ki Dkhot shillong Polytechnic, ki Nonghikai bad kiwei kiwei.
U Myntri Rangbah u la pynpaw ia ka jingkmen ba la ioh ban sakhi da la ki khmat bad ban ai ruh ia ka jingpyntikna ban sdang noh ia katei ka jaka ai jinghikai ha u Nailar na ka bynta ka samoi pule jong u snem 2025-26.
Ha ka jingioh ban lum ia ki dkhot jong ka komiti kiba khmih na ka bynta ka jingbit jingbiang jong katei ka College, u Myntri Rangbah u la ban jur ba dei ban shimkhia na ka bynta ban pynurlong noh ia katei ka thong ha shwa jong u Nailar 2025 na ka bynta ka jingmyntoi ia ki samla pule ka Jylla.
“Kumba phi la tip ba hadien ba ngi la ioh ia ka jingmynjur (approved) na ka All India Education Council for Technical Education (AICTE), ngi la lah ban sdang noh ia ka jingpule ha kane ka College naduh mynta u snem hi, kata ha lane shwa ka 15 tarik Nailar. Nga wan ha kane ka jaka na ka bynta ban pyntikna ba ki jingdonkam ki lah biang lut, ha kajuh ka por ban peit lada dang i donkam ban dang khmih shuh shuh na ka bynta ka jingiaid beit ka klas khlem kano kano ka jingduna. Nga kmen ba ka tnad kaba khmih ia kane ka bynta ka trei shitom na ka bynta ka jingbit jingbiang namar kane ka dei kaba ngi la khmih lynti la slem” pynpaw u Conrad.
