Hadien ka jingbam duh na ka jingklang jong ka ding ia katei ka jaka kaba long kum ka pliang Ja jong kiba bun ha u snem 2022, ka Sorkar Jylla lyngba ka Meghalaya Urban Development Agency (MUDA) ka la shim ia ka kabu ban tei thymmai bad pynlong kum ka Īew kaba heh na ka bynta ki briew kiba sah ha ka thaiñ Laitumkhrah.
Katei ka Īew Laitumkhrah ne ka MUDA Shopping Complex ka la iaid sted bha ha kaba la sakhi ba ka jingshna ka la jan dep pura. Kane ka Īew kan long ruh ka jingkyrkhu na ka bynta kiba im jakpoh na kane ka jaka khamtam kiba die madan. Ym tang ba kan aikam aijam hynrei ka pynsuk ruh ia ki briew kiba sah ha kitei ki thaiñ bad kan iarap ruh ia ka jingdheng kali na ka jingmih kane ka Īew thymmai, ha kaba ki briew kim donkam shuh ban leit shaduh Ïewduh ban leit thied leit pet namar kane ka jaka kaba la shna paka, ka la biang lut nadong shadong.
Ha kane ka sngi, la synran ia u Myntri Rangbah Conrad K. Sangma da ka MLA jong kane ka thaiñ Kong Ampareen Lyngdoh bad ki Nongïalam Shnong. Ha ka jingioh iakynduh markhmat bad ki nongshong Shnong bad khamtam ki nongdie madan, na ka liang jong ki, ki la pynpaw ia ka jingkmen bad ai ruh ka jingiaroh ia u Myntri Rangbah bad ia ka MLA. Da ka dur khmat ba phuh ki la wan ruh ban sakhi dalade ia ka jingitynnad kane ka Īew thymmai (building) bad angnud ruh ba kin ioh noh shen ban pyndonkam.
