U symbud Myntri Rangbah ka jylla Meghalaya, u ma Sniawbhalang Dhar, ha ka 3 tarik August 2024 u la hiar dalade ban leit jngoh ia ka long ka man jong ka Iew Muchai ka ba don ha ka shnong Mynsngat, West Jaiñtia Hills, Meghalaya.
Kane kadei ka iew kaba dang shu sdang thymmai ha u snem 2022 kaba hap hapoh ka jingpeit jong ka shnong Mynsngat bad ka Jaiñtia Hills Autonomous District Council, ka dei kaba shait long shi sien shi taiew ha ka sngi Muchai, katkum ka rukom kheiñ sngi iew ki nong Jaiñtia. Ha kane ka sngi, la synran lang ia u Symbud Myntri Rangbah da ki nongialam shong bad ki riew rangbah jong ka thaiñ.
Ha kane ka jingleit jngoh u symbud myntri rangbah. U la ioh lad ban ia syllok bad ki nongshong iew, ban sngap ia ki jingeh jong ki bad kumjuh ban sngap ia ka jingai jingmut jong ki kumno ba pynbha shuh shuh ia kane ka iew bad ka khaïi ka pateng ha kane ka thaiñ.
Haba kren bad ki nong shong iew, u ma Sniawbhalang Dhar, u la ong, ka 1 Nartiang Constiuency ka long kaba don bok shibun eh, namar ka lah doh haduh kumba 6 tylli ki iew bad kane kan plie lad plie lynti ia ka khaii ka pateng ka ban pynkiew ia ka ioh kam ioh jam bad ka ioh ka kot jong ka thain hi baroh kawei.
