U Vice President ka ri, u Jagdeep Dhankar, ha ka jingwan ïuhkjat ba nyngkong jong u ha ka nongbah Shillong, u la leit ruh ban jngoh ia ka IT Park kaba don ha Mawdiangdiang bad la synran ia u da u Myntri Rangbah ka Jylla, u Conrad K Sangma.
Haba kren ha kane ka sngi, u Vice President, u Jagdeep Dhankar u la ong ba ka jylla kaba la kiew bha ka dei ka kam kaba khia bha bad ka jingkiew ka gross domestic product (GDP) kam dei ka dak jong kane. “Ka kyrdan ba la kiew ka don katto katne ki bynta bad ki shim por, ka Meghalaya hapoh ka jingïalam jong u Conrad K Sangma ryngkat ki 10 Guarantees ka thmu ban pynlong ïa ka Meghalaya kum ka jylla ba la kiew.
U la bynrap ruh “Ba watla ngi angnud ban long ka jylla kaba la kiew hynrei ban angnud da ka rukom pyrkhat kaba pyrkhat bha da kaba shim khia ïa ka jingdon jong ki marpoh khyndew bad ka jinglah jong ki briew ka long kaba kongsan katba ngi angnud ban long ka jylla kaba la kiew”.
U Vice President u la bynrap ruh ba ha ka jingroi jingpar katto katne kiei kiei ki hap ban kiew hi kum ki surok, ka jingpyniasoh bad kiwei kiwei hynrei ka jingkhmih lynti ha ka lawei ha kaba thaw ia kita ki jingtei ruh donkam ban buh ha ka jingmut. U la pynpaw ruh ia ka jingkmen ba watla ka jingangnud ban long ka jylla kaba la kiew bha ka jingpyrkhat ka long ha ki mat ba kongsan kum ka Pule Puthi, ka Koit ka Khiah, ka Technology, ka Jingpynroi ia ki sap, ka rep ka riang, ka jingialehkai bad ka jingrwai bad kiwei kiwei.
U Myntri Rangbah u la ong ba ka Meghalaya ka la sdang ia ka kam ban pynkhih ia ka roi ka par bad ka ioh ka kot. U la ong ba ka sorkar jylla ka la ithuh ia ki bynta ba kongsan ban pynurlong ia ka thong ‘Developed Meghalaya by 2023”, haba ka jylla kan rakhe ha ka 60 snem. Da kaba kdew ïa ki jingeh jong ki 7000 tylli ki shnong ha ka jylla, kiba jngai bha ha ka liang ka jaka, nongkyndong bad ki lum, u Myntri Rangbah u la ong, “Ngi la ithuh ïa ki jingeh bad ki jingeh jong ka jylla bad ngi la pynïaid paidbah ïa ki prokram ban ai jingmyntoi ïa ki samla, ki kynthei bad ki nongrep. Ngi iaid shakhmat ban pynkhih ia ka agenda ka ioh ka kot jong ka jylla”. U la ong ba ka Gross State Domestic Product (GSDP) jong ka jylla ka long kaba duna bha ia ka national average shwa u snem 2020-21, hynrei hadien u snem 2021-22 ka jylla ka la iohi ia ka jingkiew kaba 15 percent, ha kaba ka jingkiew ha ka jingbei tyngka ha ki bynta bapher bapher jong ka imlang sahlang, ka jinglum khajna hi ka la kiew, ha ryngkat ka jingbei Pisa ka sorkar ka 15 Finance Commission kynthup ia ka jingbei Pisa lyngba ka Externally Aided Project.
U la pyntip ruh ba ka jingheh jong ka mang tyngka jong ka jylla ka ba la pynkiew na ka 12,000 klur sha ka 25,000 klur mynta. U la ong shuh shuh ba ka jingpynlut pisa ka la kiew da 2.75 sien, nalor kiwei pat ki sienjam ba la shim da ka sorkar ban pynsted ia ka jingroi.
U la iathuh shuh shuh ia u Vice President halor ka jingthmu kaba dang iaid shakhmat ban kyntiew ia ka rep ka riang, ka jingpynmih dor bad ka jingpyniaid iew, ka jingkyntiew ia ki jingialehkai bad ka jingrwai, ka pule puthi, ka koit ka khiah, kaba la buh hakhmat eh da ka sorkar.