Ha ka 19/02/2022 ka Khooid Ya Ka Wah Myntdu,ha ka jingialam u ma Khroo L Pariat President, ma Dapherborn N Suchiang Genl secy, ka kong Hunbeitki Dkhar Asstt Genl Secy bad ki dkhot ka seng, ki la leit jurip biang ia ki bynta jong ka wah Myntdu ha Mublai ka shnat jong ka wah Myntdu ha ka por 9 baje mynstep na ka bynta ban kynduh ia kiba sait jaiñ bad ban ai ka jingpynsngewthuh ia ki.
U ma Khroo L Pariat, President ula pynpaw ia ka jingsngewlyngngoh namar ba watla hapdeng ki jingialeh ka seng ban pynsngewthuh ia ki paidbah, u iohi ba dang don kiba bteng ka jingbret ñiut sha ki bynta jong ka wah Myntdu.
Kumta, ula kyrpad ia baroh kito kiba phah sait jaiñ, kiba mlien ban sait jaiñ ha wah Myntdu ba ki dei ban sngewthuh noh bad da ka jingsngewbha ki dei ban pynkhooid ia ki plastic, ki diapers, ki um sabon, ki jakhlia ba lang ha ki jaka sait jaiñ ha Mublai, ha Chkaa Jowai treyong riang namar ba baroh ki jakhlia ki tuid sha ki hali bad ki pynjaboh ia ka wah Myntdu.
Ka seng ka buh ka jingkyntu ia baroh ki nongshongshnong kiba shong ïing harud ka wah Myntdu ban ia shim bynta lang khnang ban pynneh pynbha ia ka wah Myntdu, ban biang ka um ka ba khooid, ka lyer ba pynngad ia baroh ki briew ba im na ka; da ka ba pynduhnoh ia ka jingpyndonkam ia ki pla plastic, ban bret ia ki jakhlia (biodegradable) ha ki kper la jong ba kin kylla long sboh ban pynbha ia ki jhur bad pynphuh ia ki syntiew.
Ha kane ka jingiakynduh ia ki nongsait jaiñ, la ioh ruh ka jingkren na u ma Dapherborn N Suchiang bad ka Kong Manda Bareh executive member ka seng, ha kaba kala kyntu ia baroh ki longkmie, ki kynthei ba kin ialeh ban ri ban sumar ia ka wah kumba ki sumar bad pynkhuid ia ki ïing ki sem.