Ka Confederation of Meghalaya Social Organization (COMSO) ha ka sngi nyngkong ka la leit jngoh ïa kawei na ki Infiltration Check Post kaba don ha Ratacherra, East Jaiñtia Hills ban peit bniah la ki bor ba dei peit ïa kane ka jaka jurip jong ka sorkar la ki trei hok ne em ia la ka jong ka kamram, ban jurip bad tohkit ïa ki kot ki sla jong kito ki briew kiba iaid lyngba katei ka jaka, ban pynthikna ba ki dei ne em ki nongshong shnong ka India.
Ia kane ka jingleit jngoh la ïalam da u Sambormi Lyngdoh, Vice Chairman ka COMSO Jaiñtia Hills Region, ryngkat kiwei pat ki seng hapoh ka COMSO kum ka Hynñiewtrep Youth Council (HYC), Jaiñtia Students Movement (JSM) bad ka Jaiñtia National Council (JNC).
Ha kane ka jingleit jurip, la sakhi ba ka jingtohkit ka la long kaba biang bad kane ka long kaba donkam ban tehlakam ïa ka jingwan rung ki bar jylla sha ka jylla Meghalaya bad ruh sha ka ri India hi baroh kawei. Don ruh ki briew kiba la shah bat bad phah leit phai namar ba kim don satia ki kot ki sla ba biang.
Kane jingioh rung be-aiñ jong ki bar jylla ka buh ka jingma kaba khraw ïa ki paidbah ka jylla Meghalaya, namar ka jingwan rung jong ki, ka lah ban wanrah shibun ki jingeh bad pynjot ruh ïa ki hok jong ki trai jylla, la ong u Sambormi Lyngdoh.
Shuh shuh, ha ka 21 tarik Jylliew 2025, ka COMSO ka la pynlong ïa ka jingïalang ha Shillong bad pdiang ïa ka rai ban jurip ïa baroh ki Infiltration Check Post ha kylleng ka jylla. Ha kane ka sngi, ka COMSO ka la pynpaw ba kane ka dei tang ka jingsdang ban peit bniah ïa ka rukom trei kam jong kitei ki nongpeit nongkhang. Hynrei, ki lad ki lynti kiba kham tyngeh ban teh lakam ïa ka jingwan kyrthep shapoh ka jylla yn sa pynlong ha ki sngi ban wan, bad yn shim ruh da ki sienjam kiba tyngeh lada donkam, pynpaw u Sambormi Lyngdoh, Vice Chairman ka COMSO Jaiñtia Hills uba long ruh u President ka JNC.
